Vazir oʻrinbosari Samarqandda BTEC xalqaro taʻlim dasturlarini amalga oshirish uchun tayyorgarlik ishlari bilan tanishdi
2024-10-11 10:30:00 / Vazirlik yangiliklari
Samarqand shahar kasb-hunar maktabida 773 nafar oʻquvchilar 7 ta kasb boʻyicha oʻqitilmoqda. Mazkur taʼlim muassasasida dual taʼlim shaklida kadrlar tayyorlash yoʻlga qoʻyilgan boʻlib “DAKA-INTEX” MCHJ bilan hamkorlikda 52 nafar oʻquvchilar tikuvchilik kasbi boʻyicha ham oʻqib ham ishlamoqdalar.
Tashrif davomida Buyuk Britaniyaning “Pearson” kompaniyasi bilan hamkorlikda BTEC xalqaro taʻlim dasturlarini amalga oshirish uchun tayyorgarlik ishlari bilan yaqindan tanishildi hamda xalqaro taʼlim dasturlari boʻyicha oʻqituvchilarni oʻqitish, oʻquvchilar oʻrtasida kasbga yoʻnaltirish ishlarini olib borish, oʻquv reja va dasturlarni yangilash borasidagi rejalar yuzasidan takliflar bildirildi.
Shu bilan birga oʻquvchilar amaliyotlarini tashkil etishda hamkorlik oʻrnatilgan “AFROSIYOB JEANS” MChj, “SAMARQAND SUV TAʻMINOTI” MChj, “SAMARQAND EUROASIA TEXTILE” MChj, “AMILYA GERAN” kabi ish beruvchi tashkilotlar bilan hamkorlikni yanada rivojlantirish masalalari muhokama qilindi.
Maʼlumot uchun: BTEC xalqaro taʻlim dasturlarini muvaffaqiyatli tamomlagan bitiruvchilarning malakalari dunyoning 70 dan ortiq mamlakatlarda tan olinadi va bitiruvchilar 200 dar ortiq oliy taʼlim muassasalarida taʼlimni keyingi bosqichini davom ettirish imkoniyatiga ega boʻladilar.
Samarqand transport texnikumi oʻquv ustaxonalarida yoshlarga zarur kasbiy koʻnikmalarni berish uchun amalga oshirilayotgan ishlar hamda nazariy taʼlim bilan birgalikda amaliy taʼlimning sifatini oshirish yuzasidan koʻrsatmalar berildi. Transport sohasi ustuvor yoʻnalishlardan biri ekanligi qayd etilib, soha boʻyicha yangi mutaxassisliklarni ochish va mehnat bozoriga malakali kadrlarni tayyorlash imkoniyatlari muhokama qilindi hamda kelgusidagi vazifalar belgilab olindi.
Mazkur texnikumda 220 nafar oʻquvchilar 5 ta mutaxassislik boʻyicha tayyorlanmoqda. Texnikumda “Samarqand Avto ZAZ” MChj va “Muxtor Nur trans servis” MChj bilan hamkorlikda 43 nafar oʻquvchilar ham ishlab ham oʻqish imkoniyatini beruvchi dual taʻlim shaklida oʻqitish jarayoni bilan tanishilib yoshlar bilan muloqot qilindi.
Shu bilan birga Toshkent davlat transport universiteti bilan oʻzaro hamkorlik hamda taʼlim dasturlarining integratsiyasini taʼminlash boʻyicha kelgusidagi rejalar muhokama qilindi.