Forum ishtirokchilarini Oliy taʼlim, fan va innovatsiyalar vaziri Qoʻngʻirotboy Sharipov qutlab, mamlakatimizda qizlarga munosib shart sharoitlar yaratib berish borasida  keng koʻlamli ishlar amalga oshirilayotganini taʼkidladi. 

– Ayniqsa, taʼlim sohasida xotin-qizlarni har tomonlama qoʻllab-quvvatlashga alohida eʼtibor qaratilmoqda, - dedi vazir. – Hozirda ayol-qizlarning taʼlimdagi ulushi har qachongidan yuqori va bu koʻrsatkich yildan yilga oshib borayotgani barchamizni quvontiradi. Qizlarimizning taʼlim olishga, ilmga tashnaligi yurtimiz kelajagi poydevoridir. Sizlarning har biringiz ilm-fan, sanʼat, madaniyat, iqtisodiyot  va boshqa sohalarga ulkan yutuqlarimiz nishonasidirsizlar.

 

2012-yildan beri har yilning 11-oktyabr kuni Birlashgan Millatlar Tashkiloti tomonidan Xalqaro qizlar kuni etib belgilangan. Bundan koʻzlangan maqsad qizlarning taʼlim olishi, ijtimoiy va siyosiy huquqlardan, tibbiy xizmatdan foydalanishiga imkon berish uchun dunyo ahlining saʼy-harakatlarini birlashtirishdir.
Bugungi kunda Respublikamizdagi oliy taʼlim muassasalarida jami talabalar soni 1 mln. 436 ming nafardan oshib, shundan xotin-qizlar 747 mingni (52 foizni) tashkil etadi. Magistratura bosqichida oʻqishini davom ettirayotgan jami talabalar 36 ming 399 nafarni tashkil etib, shundan talaba-qizlar soni 22 ming 822 nafar boʻlib, jami talabalar soniga nisbatan 62,70 foizni tashkil etadi.
Bu koʻrsatkich magistratura bosqichiga oʻqishga qabul qilingan talaba-qizlarimizga kontrakt toʻlovlarining davlat tomonidan toʻlab berish amaliyotining yoʻlga qoʻyilishi sababli yil sayin yaxshilanib bormoqda.
2023/2024 oʻquv yilidan boshlab, kollej va texnikumlarda qurilish, transport, kommunal, qishloq xoʻjaligi va xizmat koʻrsatish yoʻnalishlar boʻyicha toʻlov-kontrakt asosida oʻqishga qabul qilingan xotin-qizlar toʻliq davlat granti asosida oʻqishni boshladi.
Kollej va texnikumlarga oʻqishga qabul qilingan xotin-qizlar uchun talab etiladigan davlat granti mablagʻlari respublika byudjetidan ajratiladi.  Xotin-qizlar uchun yaratilgan ushbu imkoniyat ayollar kam faoliyat yuritayotgan sohalarda ularning ulushini oshishiga xizmat qilishi bilan ahamiyatlidir. 
Har yili ehtiyojmand oilalar farzandi boʻlgan 2 ming nafar xotin-qizlarimiz davlat granti asosida oliy taʼlim muassasalarga oʻqishga qabul qilinib kelinmoqda. 
Shu tariqa bugunga qadar qariyb 7 mingga yaqin xotin-qizlar davlat granti asosida oliy taʼlim oʻqishga qabul qilindi.
Mutaxassisligi boʻyicha kamida 5 yil mehnat stajiga, lekin oliy maʼlumotga ega boʻlmagan 500 nafar xotin-qizlarimiz har yili Oila va xotin-qizlar davlat qoʻmitasi tavsiyanomalariga asosan test sinovlari natijalariga muvofiq kontrakt asosida oʻqishga qabul qilinmoqda. 
Davlat oliy taʼlim muassasalarining magistratura bosqichida oʻqiyotgan barcha xotin-qizlarning kontrakt toʻlovlari qoplab berilishi va bunga har yili kamida davlat byudjetidan 200 mlrd. soʻm ajratib borilmoqda. 
Bugungi kunda, Davlat oliy taʼlim muassasalarining magistratura bosqichida oʻqiyotgan xotin-qizlarning kontrakt toʻlovlari uchun Davlat byudjetidan:
2022/2023 oʻquv yilida 14 ming 110 nafar talaba xotin-qizlarga 152,9 mlrd. soʻm mablagʻ;
2023/2024 oʻquv yilida 5 ming 991 nafar talaba xotin-qizlarga 60,3 mlrd. soʻm mablagʻ Davlat byudjeti hisobidan toʻlab berilgan.
Mazkur oʻquv yilida xam bu amaliyot davom etadi.
2023-2024-yillarda oliy taʼlimdan keyingi taʼlim institutlariga stajyor-tadqiqotchilar va doktoranturada tahsil olayotgan tadqiqotchilar 11.092 nafar boʻlib, shundan xotin-qizlar 5.831 nafar (52 %) ni tashkil etadi.

Shuningdek, vazirlik tomonidan xotin-qizlarni ilm-fanga keng jalb qilish, xotin-qizlarning yangi gʻoya va ishlanmalarini har tomonlama qoʻllab-quvvatlash va ragʻbatlantirish uchun ilmiy faoliyatga oid davlat dasturlari doirasida muntazam ravishda ilmiy jamoada yosh olimalar, iqtidorli talaba-magistrlardan iborat boʻlgan “Olima ayollar grantlari” tashabbuskor amaliy va innovatsion loyihalar tanlovlari eʼlon qilinib kelinmoqda.