Toshkentda Oʻzbekiston va Birlashgan Arab Amirliklari hukumatlararo tajriba almashinuv davrasi oʻz ishini boshladi
2024-09-27 11:25:00 / Vazirlik yangiliklari
Forumda Oliy taʼlim, fan va innovatsiyalar vaziri Qoʻngʻirotboy Sharipov ham ishtirok etib, ikki tomonlama hamkorlikning ustuvor yoʻnalishlarini oʻz ichiga olgan muhokamalarda qatnashdi.
Shuningdek, ikki tomonlama hamkorlikning ustuvor yoʻnalishlari boʻyicha loyiha va tashabbuslarni muhokama qilish maqsadida 8 ta klaster, xususan Taʼlim va hududlarni rivojlantirish qoʻshma ishchi guruhi oʻz ishini boshladi.
Vazir Q. Sharipov boshchiligidagi ishchi guruh tomonidan muhandislik sohasida energetika, sun’iy intellekt, atrof-muhit muhofazasi, biotexnologiya, raqamli texnologiyalar kabi yo‘nalishlarni hamkorlikda rivojlantirish, qo‘shma loyihalarni birgalikda amalga oshirish masalalarini muhokama qilindi.
Taʼkidlash joizki, soʻnggi yillarda Oʻzbekiston bilan BAA oʻrtasidagi koʻp qirrali munosabatlar, jumladan taʼlim, ilm-fan, hududlarni innovatsion rivojlantirish sohalarida jadal rivojlanib bormoqda.
Ushbu tadbir ham davlat boshqaruvi, iqtisodiyot, ijtimoiy sohaning ustuvor yoʻnalishlari boʻyicha ikki tomonlama hamkorlikni yanada rivojlantirish, yangi loyiha va tashabbuslarni amalga oshirish boʻyicha kelishuvlarga erishish maqsadida tashkil etildi.