Rossiya Federatsiyasi bilan oliy ta’lim, fan va innovatsiyalar sohasidagi hamkorlik istiqbollari muhokama qilindi
2024-08-28 16:00:00 / Vazirlik yangiliklari
Delegatsiya vakillari “Sharq taronalari” XIII xalqaro musiqa festivali va “Sharq xalqlari musiqa madaniyati: globallashuv jarayonlarida ijodiy uyg‘unlashuv tamoyillari” mavzusidagi Xalqaro ilmiy-amaliy konferensiya dasturlarining ochilish marosimida ishtirok etish maqsadida O‘zbekistonga tashrif buyurgan.
M.E.Shvidkoy tadbir yuqori darajada tashkil etilganini e’tirof etib, O‘zbekiston va Rossiya o‘rtasidagi oliy ta’lim, fan va innovatsiyalar sohasidagi hamkorlik aloqalarining hozirgi holatiga to‘xtaldi va mamlakatlarimiz o‘rtasida professor-uqituvchilar va talabalar almashinuvi sohasida hamkorlikni yanada rivojlantirish lozimligini ta’kidladi.
O‘z navbatida, vazir Q.Sharipov O‘zbekiston va Rossiya Federatsiyasi o‘rtasida oliy ta’lim, fan va innovatsiyalar sohasidagi hamkorlikning yuqori darajada ekanligini e’tirof etib, Rossiyaning Toshkentdagi Ilm-fan va madaniyat markazi bilan faol hamkorlik amalga oshirilayotgani aytib o‘tdi. Shuningdek, abiturientlarga Rossiyaning tegishli oliy o‘quv yurtlarini tanlash imkonini beruvchi hamda mamlakatlar o‘rtasidagi akademik aloqalarni mustahkamlashga xizmat qiluvchi qo‘shma ta’lim yarmarkalari tashkil etilgani qayd etildi.
Uchrashuvda ikki mamlakat o‘rtasida qo‘shma ilmiy loyihalar tanlovini tashkil etish masalasi ham muhokama etildi. Mazkur tanlovlar O‘zbekiston va Rossiya olimlari hamda tadqiqotchilari o‘rtasida ilmiy hamkorlikni mustahkamlash, innovatsion g‘oyalar va yangiliklarni rivojlantirish uchun yangi imkoniyatlar yaratib, ilmiy-tadqiqot faoliyatini qo‘llab-quvvatlash va ilg‘or tajribalarni almashishda muhim platforma bo‘lib xizmat qilishi kutilmoqda.
Uchrashuv yakunlariga ko‘ra vazir Q.Sharipov Kursk viloyatidagi vaziyatni inobatga olgan holda, o‘zbekistonlik talabalarning xavfsizligini ta’minlash maqsadida ularning ta’lim olish jarayonini onlayn formatga o‘tkazish taklifini bildirildi va O‘zbekiston tomoni Rossiya bilan ushbu masala bo‘yicha yaqindan hamkorlik qilishga tayyor ekanini ma’lum qildi.