O‘zbekiston Respublikasi Oliy taʼlim, fan va innovatsiyalar vazirligi

Moratoriy davrida Oliy ta’lim, fan va innovatsiyalar vazirligiga soha bo‘yicha yagona davlat siyosatini olib boruvchi tashkilot sifatida oliygohlar faoliyatini ichki nazorat asosida tartibga solib borilishini ta’minlash yuklatilgan.

Ushbu topshiriq ijrosini ta’minlash maqsadida Hisob palatasi, Bosh prokuratura, Iqtisodiyot va moliya vazirligi bilan hamkorlikda oliygohlarning 65 nafar ichki audit xodimining bilim va malaka salohiyatini tahlil qilish, baho berish, mustahkamlash, shuningdek, korrupsiyaviy holatlarning oldini olish va unga yo‘l qo‘ymaslik mas’uliyatini oshirishga qaratilgan 2 kunlik o‘quv seminari tashkil etildi.

Unda mutaxassislar tomonidan oliy ta’lim muassasalari ichki audit xizmati xodimlariga moratoriy davrida mas’uliyat va javobgarlik yanada ortishi tushuntirildi. Shuningdek, o‘tkazilayotgan nazorat tadbirlarida e’tibor qaratiladigan muhim jihatlar, samarasiz xarajatlarni aniqlash, undirish va byudjetga tiklash borasida batafsil ma’lumot berildi.

O‘quv seminari yakunlangach, olgan bilimlari Iqtisodiyot va moliya vazirligi bilan hamkorlikda ishlab chiqilgan savollar asosida test sinovidan o‘tkazildi. Test sinovi natijasida 11 nafar ichki audit xizmati xodimining faoliyati 56,0 balldan past baholandi.

So‘ng vazirlik xodimlaridan tuzilgan Ishchi guruh tomonidan 65 nafar ishtirokchining 2023-yil va 2024-yil 1-yarim yillikdagi faoliyati natijalari, sohaga oid bilimlari savol-javob asosida suhbatdan o‘tkazildi.

O‘quv seminari yakuniga bag‘ishlab o‘tkazilgan yig‘ilishda oliygohlarning 65 nafar ichki audit xodimining faoliyat samaradorligi ham tahlil qilindi.

2024-yilning o‘tgan davrida vazirlik Ichki audit boshqarmasi tomonidan jami 56,6 mlrd so‘mlik moliyaviy kamchiliklar aniqlangan bo‘lsa, oliygohlarning ichki audit xizmati xodimlari tomonidan esa bor yo‘g‘i 4,2 mlrd so‘m holat aniqlangani tanqid qilindi.

Shuningdek, ayrim hollarda oliy ta’lim muassasalari ichki audit xizmatlari tomonidan aniqlangan samarasiz xarajatlar, ortiqcha to‘lovlar va kamomadlar o‘rnatilgan tartibda undirilib, byudjetga tiklanishi nazoratdan chetda qolgani ko‘rsatib o‘tildi. 

Ayrim muassasalar auditorlari tomonidan aniqlangan samarasiz xarajatlarni undirish va byudjetga tiklash umuman ta’minlanmagan. Ushbu holatlarga yo‘l qo‘ygan va test natijalari past, hisobot ko‘rsatkichlari yomon hamda suhbat natijasiga ko‘ra 11 nafar audit xizmati xodimining kelgusi faoliyatiga ishonchsizlik bildirililib, ularini lavozimicda kelgusida ishlash masalasini ko‘rib chiqish yuzasidan oliygohlar rahbariga taqdimnoma kiritildi.