O‘zbekiston Respublikasi Oliy taʼlim, fan va innovatsiyalar vazirligi

Mazkur tadbir Oliy taʼlim, fan va innovatsiyalar vazirligi, “Oʻzmilliybank” AJ, Savdo-sanoat palatasi, Jizzax viloyati hokimligi hamda Yoshlar ishlari agentligi hamkorligida oʻtkazildi.

Koʻrgazmaning tantanali ochilish marosimida soʻzga chiqqan masʼullar va mutasaddilar bugungi kunda mamlakatimizda yoshlarga yaratilayotgan keng koʻlamli imkoniyatlarga toʻxtalib oʻtishdi. Xususan, bitiruvchilarni kasbga yoʻnaltirish, ularning bandligini taʼminlash hamda mehnat bozoriga ogʻriqsiz integratsiya qilish borasidagi islohotlarning ahamiyati taʼkidlandi. Bu kabi koʻrgazmalar yoshlarning mustaqil hayotga qadam qoʻyishida tajriba maktabi vazifasini oʻtashi, ularga ertangi kunga boʻlgan ishonchni bagʻishlashi alohida eʼtirof etildi.

“Talaba Expo – 2026” doirasida tashkil etilgan ochiq muloqot tadbirning eng qizgʻin nuqtalaridan biri boʻldi. Unda 500 nafardan ortiq bitiruvchi talabalar bevosita ishtirok etib, bandlik, xususiy tadbirkorlik va kasbiy oʻsish imkoniyatlari yuzasidan oʻz fikr-mulohazalari bilan oʻrtoqlashdilar. Shuningdek, muloqot davomida “Kelajakka qadam” dasturining mazmun-mohiyati, startap loyihalarini qoʻllab-quvvatlash mexanizmlari va taʼlimning xususiy sektor bilan hamkorligi kabi dolzarb masalalar muhokama qilindi.
Koʻrgazma shunchaki nazariy maydon emas, balki amaliy yordam va motivatsiya markaziga aylandi. Tadbir doirasida 4 nafar eng faol bitiruvchiga tadbirkorlik faoliyatini boshlash yoki kengaytirish uchun 1 million soʻmdan 500 million soʻmgacha boʻlgan vaucherlar tantanali ravishda topshirildi. Bundan tashqari, oʻzining iqtidori va intiluvchanligini namoyon etgan 50 nafardan ortiq faol talabalar faxriy yorliq hamda qimmatbaho esdalik sovgʻalari bilan taqdirlandi.

Shu kuni talabalar tomonidan biznes loyihalar taqdimoti (pitching) ham oʻtkazilib, undagi eng istiqbolli va innovatsion gʻoyalar saralab olindi. Ushbu gʻoyalarni amaliyotga tatbiq etish uchun yoshlarga imtiyozli kreditlar ajratilishi belgilandi.
Umumiy hisobda “Kelajakka qadam” dasturi doirasida oʻtkazilgan mazkur yirik tadbir viloyatdagi oliy taʼlim muassasalarining 6 ming nafardan ortiq bitiruvchi talabalarini oʻzida jamladi.

Eng asosiy natijalardan biri shu boʻldiki, koʻrgazmada 120 dan ortiq yirik ish beruvchi korxona va tashkilotlar ishtirok etib, oʻzlaridagi 381 ta boʻsh ish oʻrinlariga (vakansiyalarga) bitiruvchilarni saralab oldilar va ularga toʻgʻridan-toʻgʻri ishga joylashish boʻyicha tavsiyalar berildi.
Bir soʻz bilan aytganda, “TalabaExpo-2026” Jizzax yoshlari uchun yangi marralar sari oʻziga xos tramplin vazifasini oʻtab berdi.