“Vazir kubogi”: qizlar oʻrtasida chim ustida xokkey — ilk musobaqa, ilk gʻoliblar
2026-04-09 14:00:00 / Vazirlik yangiliklari
Mazkur musobaqa nafaqat yangi sport yoʻnalishining amaldagi ilk qadamlaridan biri, balki talaba-qizlarning jismoniy faolligi, jamoaviy uygʻunligi va sportga boʻlgan qiziqishini namoyon etgan muhim maydonga aylandi. Final bellashuvlari davomida jamoalar gʻalaba uchun soʻnggi daqiqalarga qadar kurash olib borib, tomoshabinlarga haqiqiy sport shijoati va irodasini namoyish etdilar.
Oʻyinlar yakuniga koʻra:
• 1-oʻrin — Oʻzbekiston davlat jahon tillari universiteti jamoasi
• 2-oʻrin — Andijon davlat chet tillari instituti jamoasi
• 3-oʻrin — Buxoro davlat pedagogika instituti jamoasiga nasib etdi
Gʻolib va sovrindor jamoalar munosib ragʻbatlantirilib, mos ravishda 50 million, 40 million va 30 million soʻm miqdorida pul mukofotlari bilan taqdirlandi. Shuningdek, musobaqa davomida alohida mahorat va faollik namoyon etgan sportchi qizlar ham eʼtibordan chetda qolmadi. Eng yaxshi oʻyin koʻrsatgan ishtirokchilar turli nominatsiyalar boʻyicha munosib taqdirlanib, ularga pul mukofotlari topshirildi.
Tantanali taqdirlash marosimida Qoʻngʻirotboy Sharipov, universitet rektori Ilxomjon Tuxtasinov hamda Oʻzbekiston chim ustida xokkey federatsiyasi raisi oʻrinbosari Rinat Axmadulin ishtirok etdilar.
Tadbir yakunida gʻolib jamoalarga kubok va esdalik sovgʻalari topshirilib, musobaqa ishtirokchilari uchun unutilmas lahzalar yaratildi.
Mazkur musobaqa “Vazir kubogi” doirasida yangi sport turlarini joriy etish, talaba yoshlar oʻrtasida sogʻlom turmush tarzini targʻib qilish va xotin-qizlarni sportga keng jalb etish borasida muhim ahamiyat kasb etdi.