Oliy taʼlim tizimida ichki auditni takomillashtirish: ekonometrik va analitik modellar muhokama qilindi
2026-03-18 14:10:00 / Vazirlik yangiliklari
Unda vazirlikning ichki audit xizmati masʼullari, Iqtisodiyot va moliya vazirligi masʼul xodimlari, Toshkent davlat iqtisodiyot universiteti sohaga oid olim oʻqituvchilari, hamda oliy taʼlim muassasalarining tegishli soha xodimlari ishtirok etdi.
Seminar davomida Toshkent davlat iqtisodiyot universiteti oʻqituvchilari Quvonchbek Rahimberdiyev va Nuriddin Rahimovlar “Ichki audit nazorat tadbirlarini rejalashtirish jarayonida maʼlumotlarni qayta ishlashda foydalanish boʻyicha ekonometrik va analitik modellarni ishlab chiqish” mavzusida maʼruza qildilar.
Iqtisodiyot va moliya vazirligi boshqarma boshligʻi Azamat Jabbarov ichki audit sohasiga ekonometrik va analitik modellarni joriy etishning dolzarbligi, xalqaro tajribalar hamda imkoniyatlari boʻyicha oʻzining fikrlarini bildirdi.
Tadbir davomida mutaxassislar tomonidan ichki audit jarayonlarini raqamlashtirish, xavf-xatarlarni oldindan baholash va moliyaviy xatoliklarning oldini olishda matematik-statistik modellarning oʻrni alohida taʼkidlandi. Xususan, bunday tahliliy vositalarni amaliyotga toʻgʻri tatbiq etish orqali, davlat byudjet mablagʻlaridan foydalanish va auditorlik profilaktik tadbirlarning samaradorligini oshirish, vaqt va resurslarni tejash hamda moliyaviy shaffoflikni taʼminlash imkoniyatlari tushuntirildi.
Ochiq muloqot va qizgʻin savol-javoblar ruhida oʻtgan seminarda ishtirokchilar yangi modellarning amaliy afzalliklari, ularning maqsadi va keng imkoniyatlari yuzasidan oʻzaro fikr va tajriba almashdilar.