Vazir Samarqandda mahallalarni rivojlantirish boʻyicha talabalar loyihalari bilan tanishdi
2026-02-08 10:00:00 / Vazirlik yangiliklari
Oliy taʼlim, fan va innovatsiyalar vaziri Qoʻngʻirotboy Sharipov Samarqand viloyatiga tashrifi doirasida Kattaqoʻrgʻon tumanidagi “Boltabek” mahallasida boʻlib, Mirzo Ulugʻbek nomidagi Samarqand davlat arxitektura-qurilish universiteti talabalari, magistrlari va yosh tadqiqotchilari tomonidan ishlab chiqilgan loyihalar bilan tanishdi. Kattaqoʻrgʻon tumanida “ogʻir” toifaga kiruvchi 9 ta mahalla belgilangan boʻlib, talabalar oʻz gʻoya va takliflarini taqdimotlar orqali namoyish etdilar.
Tashrifda viloyat hamda tuman mutasaddi rahbarlari, universitet jamoasi va masʼul tashkilotlar vakillari ishtirok etdi.
Maʼlumki, Prezident Shavkat Mirziyoyev raisligida joriy yil 23-yanvar kuni oʻtkazilgan videoselektor yigʻilishida berilgan topshiriq ijrosi doirasida universitetning shahar qurilishi va kommunal infratuzilmani boshqarish, geodeziya, arxitektura, qurilish, shaharsozlik hamda iqtisodiyot yoʻnalishlarida tahsil olayotgan bitiruvchi kurs talabalari, magistrlar va yosh tadqiqotchilari Samarqand viloyatidagi 103 ta mahallaga biriktirilgan.
Hozirda talabalar maxsus tashkil etilgan shtabda masʼul tashkilotlar bilan hamkorlikda mahallalarning master rejalarini ishlab chiqish boʻyicha amaliy takliflar tayyorlamoqda. Ularda infratuzilmani yaxshilash, qurilish va energetika masalalari, qishloq xoʻjaligi, tadbirkorlik hamda xizmatlar sohasini rivojlantirishga alohida eʼtibor qaratilmoqda.
Tashrif davomida vazir mahallani ijtimoiy-iqtisodiy rivojlantirish boʻyicha qator tavsiyalar berdi. Jumladan, kambagʻallikni qisqartirish va yangi ish oʻrinlari yaratish maqsadida anorchilik, baliqchilik, chorvachilik kabi yoʻnalishlarda tadbirkorlikni kengaytirish zarurligi taʼkidlandi.