Vazir o‘rinbosari Buxorodagi oliygohlarda qurilayotgan binolar va rejalashtirilgan loyihalar bilan tanishdi
2024-05-29 10:30:00 / Vazirlik yangiliklari
Dastlab, Oliy ta’lim, fan va innovatsiyalar vazirining o‘rinbosari Sarvarxon Buzrukxonov Buxoro davlat pedagogika institutida bo‘lib, 400 o‘rinli talabalar turar joyi binosining qurilish ishlari va institut hududida qurilishi rejalashtirilgan binolarning loyihalari bilan yaqindan tanishdi. Vazir o‘rinbosari tomonidan qurilish, ta’mirlash ishlarini o‘z muddatida, sifatli yakunlash yuzasidan ko‘rsatmalar berildi.
So‘ng Buxoro shahrida qurilayotgan universal sport majmuasining yangi binosi borib ko‘rildi.
Keyingi manzil Buxoro tabiiy resurslarni boshqarish institutida DXSh asosida qurilayotgan 400 o‘rinli talabalar turar joyi bo‘ldi. Ushbu yotoqxona yangi o‘quv yili boshida foydalanishga topshirish rejalashtirilgan. Mas’ullarga bino atrofida talabalar uchun zarur barcha sharoitlar yaratish bo‘yicha vazifalar topshirildi. Shuningdek, institut hududida futbol bo‘yicha barpo etilgan futzalda Jahon chempionatida mashg‘ulot o‘tash uchun tayyorlik holati o‘rganildi.
Shundan so‘ng, Buxoro davlat universiteti Agronomiya va biotexnologiya fakulteti uchun qurilayotgan 400 o‘rinli talabalar turar joyi ko‘zdan kechirildi.