O‘zbekiston Respublikasi Oliy taʼlim, fan va innovatsiyalar vazirligi

Dastlab, tomonlar professional ta’lim sohasida amalga oshirilayotgan islohotlar haqida to‘xtalib, tizimni kompleks rivojlantirish borasida fikr almashishdi.

Uchrashuvda elchi Konstantin Obolenskiy keyingi yillarda O‘zbekistonda olib borilayotgan islohotlarni kuzatib borayotgani, bunda ta’limdagi o‘zgarishlar ustuvor yo‘nalish kasb etayotganini alohida ta’kidladi. U Shveysariya O‘zbekiston professional ta’lim tizimini kompleks rivojlantirishdagi hamkorlik aloqalarini yangi bosqichga olib chiqishga tayyor ekani, yangi formatdagi hamkorlik bunga zamin bo‘lishini bildirdi. 

Vazir Qo‘ng‘irotboy Sharipov kasbiy ta’lim sohasidagi Shveysariyaning ilg‘or tajribasini o‘rganish hamda uni O‘zbekiston professional ta’lim tizimiga tatbiq etishda Shveysariya hukumati tomonidan moliyalashtirilayotgan loyihalar bevosita mazkur soha rivojiga katta ko‘mak ekanligini qayd etdi. 

Shuningdek, muloqot davomida birgalikda O‘zbekistonda professional ta’limni rivojlantirish rejasini (strategiyasini) ishlab chiqish, Shveysariya kasbiy ta’limi mutaxassislarini jalb qilgan holda zamonaviy metodikalar asosida pedagoglar tayyorlash va o‘qituvchilar malakasini oshirish, dual ta’limni joriy etish kabi masalalar ko‘rib chiqildi.

Elchi O‘zbekiston professional ta’lim tizimining jozibadorligini oshirish, xususan, inklyuziv va dual ta’limni joriy etish, ta’lim sifatini ta’minlash, xususiy sektor hamkorligida o‘rta bo‘g‘in kadrlarni tayyorlash yuzasidan Shveysariyaning ilg‘or tajribasini bo‘lishishga tayyor ekanini ta’kidladi.

Uchrashuv yakunida tomonlar professional ta’lim tizimini rivojlantirish hamda qo‘llab-quvvatlash borasidagi hamkorlikni yanada rivojlantirishga kelishib oldilar.