Saudiya Arabistoni O‘zbekiston OTMlari bilan hamkorlik yo‘nalishlari va shakllarini kengaytiradi
2024-05-08 09:55:00 / Vazirlik yangiliklari
8-may kuni Oliy ta’lim, fan va innovatsiyalar vaziri Qo‘ng‘irotboy Sharipov Saudiya Arabistoni Podshohligining mamlakatimizdagi Favqulodda va Muxtor elchisi Yusuf al-Utaybiy bilan uchrashuv o‘tkazdi.
Unda tomonlar ikki mamlakat oliy ta’lim muassasalari o‘rtasida aloqalarni yanada kengaytirish, O‘zbekistondagi bir qator universitetlarda arab tili o‘qitilishi sifatini oshirish, shuningdek, o‘zbekistonlik talabalarni Saudiyaning yetakchi universitetlarida grant asosida ta’lim olishi imkoniyatlarini ko‘paytirish masalalarini muhokama qildilar.
Elchi Saudiya Arabistoni O‘zbekiston oliy ta’lim muassasalari bilan hamkorlik yo‘nalishlari va shakllarini faollashtirish bo‘yicha takliflarni ko‘rib chiqish va amalga oshirishga tayyor ekanini qayd etdi.
Shuningdek, Toshkent davlat sharqshunoslik universitetining Podshoh Salmon xalqaro arab tili akademiyasi bilan yo‘lga qo‘yilgan hamkorligi e’tirof etildi.