O‘zbekiston Respublikasi Oliy taʼlim, fan va innovatsiyalar vazirligi

Uchrashuv davomida O‘zbekiston va Yaponiya o‘rtasidagi oliy taʼlim hamda ilm-fan sohalaridagi hamkorlikning bugungi holati, mavjud qo‘shma loyihalar, akademik almashinuv dasturlari, professor-o‘qituvchilar malakasini oshirish, oliy taʼlim muassasalarida yapon tilini o‘qitishni kengaytirish, shuningdek, qo‘shma ilmiy tadqiqotlarni yanada rivojlantirish masalalari muhokama qilindi.

Vazir Q. Sharipov mamlakatimizda oliy ta’lim va ilm-fan yo‘nalishlarida hozirgi asosiy e’tibor texnika va muhandislik, axborot-raqamli texnologiyalar, sanoat texnologiyalari, tibbiyot, innovatsion ishlanmalar, mashinasozlik, energetika, qayta tiklanuvchi energiya manbalari, geologiya, arxitektura va qurilish kabi sohalarda o‘zaro manfaatli dasturlarni kengaytirish va chuqurlashtirishga qaratilganini alohida ta’kidladi.

Tomonlar kelgusida O‘zbekistonda qo‘shma universitet tashkil etish bo‘yicha amaliy ishlarni jadallashtirish, Yaponiyaning yetakchi universitetlari bilan yangi hamkorlik memorandumlarini imzolash, talabalar, ilmiy izlanuvchilar va tadqiqotchilar almashinuvini kengaytirish, yapon professor-o‘qituvchilarini qisqa va uzoq muddatli ma’ruza va seminar o‘qishga jalb etish, ilmiy-texnologik yo‘nalishlarda qo‘shma tadqiqot loyihalarini kuchaytirish yo‘nalishlarda hamkorlikni yanada faollashtirishga tayyor ekanliklarini bildirdilar.

Shuningdek, professional ta’lim sohasida keng ko‘lamli hamkorlikni rivojlantirish masalalari ham muhokama qilindi.
Uchrashuv yakunida O‘zbekiston-Yaponiya aloqalarini kengaytirish hamda ikki davlat oliy ta’lim muassasalari o‘rtasidagi hamkorlikni yangi bosqichga ko‘tarish borasida o‘zaro qo‘llab-quvvatlashga erishildi.