Taddirni Oliy Majlis Senati Xotin-qizlar va gender tenglik qoʻmitasi raisi Malika Qadirxonova kirish soʻzi bilan ochib, AKT sohasidagi qizlarni ushbu sana bilan qutladi va bugungi kunda yurtimizda AKT sohasida berilayotgan imkoniyatlar haqida gapirib, qizlar tomonidan soha boʻyicha erishilgan yutuqlarga ham toʻxtalib oʻtdi. 

Dasturlash — bugungi kunda eng talabgor sohalardan biri. 2023-yilda dunyo miqyosida 27,7 millionga yaqin veb-dasturchi ishlagan boʻlsa, ularning 20 foizi ayollarga to‘g‘ri kelgan. Sunʼiy idrok (AI)ga ixtisoslashgan dasturchilar orasida esa ayollar ulushi 26,1 foizni tashkil etgan. Oʻzbekistonda ham IT tarmoqda mehnat qilayotgan jami xodimlarning taxminan 33 foizi xotin-qizlardan iborat.

Oliy taʼlim, fan va innovatsiyalar vazirligi mutasaddilari oliy taʼlim tizimida raqamlashtirish yuzasidan amalga oshirilayotgan ijobiy ishlarga to‘xtalib o‘tishdi. 

“Oliy taʼlim jarayonlarini boshqarish” (HEMIS) axborot tizimini joriy etish orqali oliy taʼlim muassasalarining boshqaruv, oʻquv, ilmiy va moliyaviy faoliyatini raqamlashtirishga erishildi. Tizimni joriy etish orqali talabalarning guruh jurnallari hamda oʻzlashtirish qaydnomalari faqat elektron tarzda shakllantirilishi yoʻlga qoʻyilgan.
Ayni vaqtda “Oliy taʼlim jarayonlarini boshqarish” xamda oʻquvchi va talabalar xamda oʻqituvchilar maʼlumotlar bazalari Elektron hukumatning idoralararo integratsiyalashgan platformasiga ulangan boʻlib talabalar va oʻqituvchilar toʻgʻrisidagi maʼlumotlardan, bitiruvchilarning diplom maʼlumotlaridan vazirlik va idoralar foydalanib kelmoqda. 

2022-yilning oktyabr oyidan boshlab Yagona interaktiv davlat xizmatlari portali hamda Davlat xizmatlari markazlari orqali oliy, oʻrta maxsus va professional taʼlim toʻgʻrisidagi hujjatlarning dublikatini berish boʻyicha davlat xizmati ishga tushirildi.
Bakalavriat va magistraturaga talabalikka tavsiya etilgan abituriyentlar va barcha bosqich talabalari uchun toʻlov-shartnomalarni elektron koʻrinishda olish hamda toʻlovlarni onlayn amalga oshirish imkoniyati yaratildi. Joriy oʻquv yilida abituriyent va talabalarga kontrakt.edu.uz platformasi orqali – 730 mingdan ortiq shartnoma onlayn tarzda taqdim etildi.
Oliy taʼlimdan keyingi taʼlim tizimini muvofiqlashtirish va taʼlim jarayonlarini boshqarish toʻliq raqamlashtirildi. Hozirda 14030 nafar izlanuvchilar hamda 39 ta vazirlik va idoralar, ular tasarrufida boʻlgan ilmiy darajali kadrlar tayyorlash institutlari phd.mininnovation.uz elektron platformasiga biriktirilgan.

Tadbirda AKT sohasida yuqori natijalarga erishgan qizlar oʻz taqdimotlari bilan ishtirok etdi.