Jizzax viloyati Do‘stlik tumani hokimligi

Bugun, 12 oktyabr kuni Xalq deputatlari Do‘stlik tuman Kengashining yettinchi chaqiriq o‘n sakkizinchi sessiyasi bo‘lib o‘tdi.

Unda tuman hayotining bir qator muhim yo‘nalishlari, jumladan, jinoyatchilik va huquqbuzarliklarning oldini olish, korrupsiyaga qarshi kurashish, aholi murojaatlari bilan ishlash, yoshlar siyosati hamda qishloq xo‘jaligini suv bilan ta’minlash masalalari ko‘rib chiqildi.

Sessiya kun tartibidagi dastlabki masalalar jamoat xavfsizligini ta’minlash va qonuniylikni mustahkamlashga qaratildi. Tuman prokurori Samandar Razzaqovning 2026 yilning to‘qqiz oyi davomida jinoyatchilikni jilovlash va korrupsiyaning oldini olish borasida amalga oshirilgan ishlar to‘g‘risidagi axboroti tinglandi. Shuningdek, tuman IIB boshlig‘i Gʻulom Mamatqulovning huquqbuzarliklarga qarshi kurashish va ularning oldini olish yuzasidan hisoboti eshitildi.

Muhokamalarda hududda huquqbuzarliklarning oldini olish, jamoat tartibini saqlash va aholi xavfsizligini ta’minlash masalalariga e’tibor qaratildi.

Kun tartibidan aholi murojaatlari bilan ishlash masalasi ham o‘rin oldi. O‘zbekiston Respublikasi Prezidentining Do‘stlik tumanidagi Xalq qabulxonasi tuman bo‘limi rahbari o‘rinbosari Ergash Aliyev hududiy tashkilotlar rahbarlari faoliyati va murojaatlar bilan ishlash holati yuzasidan 2026 yilning birinchi yarmida amalga oshirilgan ishlar haqida axborot berdi. Bu masala aholi bilan muloqotni kuchaytirish, murojaatlarni o‘z vaqtida ko‘rib chiqish va ularning yechimi bo‘yicha mas’uliyatni oshirish nuqtai nazaridan muhim ahamiyat kasb etadi.

Yoshlar masalasi ham e’tibordan chetda qolmadi. Yoshlar ishlari agentligi tuman bo‘limi boshlig‘i Doston Rashidovning hisoboti tinglanib, joriy yilning to‘qqiz oyida yoshlarga oid davlat siyosatini amalga oshirish borasida olib borilgan ishlar muhokama qilindi.

Qishloq xo‘jaligi uchun muhim bo‘lgan suv resurslaridan samarali foydalanish masalasi ham sessiya kun tartibidan joy oldi. Tuman suv yetkazib berish xizmati davlat muassasasi direktori Sherzod Qurolov 2026–2027 yillar novegetatsiya davrida qishloq xo‘jaligi ekinlarini sug‘orishni tashkil etish uchun suv resurslari limitini ko‘rib chiqish va tasdiqlash yuzasidan hisobot berdi. Mazkur masala qishloq xo‘jaligida suvdan oqilona foydalanish va sug‘orish ishlarini rejali tashkil etishda muhim o‘rin tutadi.

Shuningdek, mahalliy byudjetning qo‘shimcha manbalari hisobidan mablag‘ ajratish masalasi tuman hokimi Shavkat Darvishev tomonidan ko‘rib chiqish uchun taqdim etildi.

Sessiyada Xalq deputatlari viloyat Kengashi kotibiyat mudiri Nodira Karimova ishtirok etdi.

Muhokama etilgan masalalar hamda ular bo‘yicha qabul qilingan kengash qarorlari tumanning ijtimoiy-iqtisodiy hayoti, jamoat xavfsizligi va aholi manfaatlarini ta’minlash bilan bevosita bog‘liqligi bilan ahamiyatlidir. Bunday sessiyalar hududdagi dolzarb vazifalarni va mas’ul tashkilotlar oldida turgan ustuvor yo‘nalishlarni belgilashda muhim maydon bo‘lib xizmat qiladi.