Jizzax viloyati hokimi kubogi va 2-liga finalida Do‘stlik tumani jamoasi 2-o‘rinni egalladi
2026-04-11 23:50:00 / Yangiliklar
Futzal bo‘yicha Jizzax viloyati hokimi kubogi hamda 2-liga bahslarining eng kutilgan — final uchrashuvi yakuniga yetdi. Bugungi o‘yin nafaqat musobaqa yakuni, balki butun mavsum davomidagi mehnat va intilishlarning haqiqiy sinovi bo‘ldi.
Do‘stlik tumani sport majmuasida o‘tkazilgan bahsda mezbon — “Do‘stlik” jamoasi va munosib raqibi “Ezgu niyat” jamoasi g‘alaba uchun shiddatli kurashga kirishdi.
Maydon egalari va mehmonlari bahsi teng kurashlarda o‘tdi. Asosiy vaqtning so‘nggi soniyalarigacha tomoshabinlar hayajon bilan o‘tirishdi. Ortda borayotgan mezbonlar o‘yin oxirida hisobni tenglashtirishdi. Natija — 3:3 hisobidagi durang. Qaynoq bahs qo‘shimcha vaqtga o‘tdi.
Qo‘shimcha taymning ikkinchi bo‘limining so‘nggi daqiqalarida “Ezgu niyat” jamoasi a’zolari mezbonlar darvozasiga hal qiluvchi to‘pni kiritib, g‘alabani qo‘lga kiritdilar.
Taqdirlash marosimi esa alohida tantana bilan o‘tdi. Unda viloyat Sog‘liqni saqlash boshqarmasi hamda BMB Jizzax jamoalari uchinchi o‘rinni, “Do‘stlik” jamoasi ikkinchi o‘rinni, “Ezgu niyat” jamoasi esa birinchi o‘rinni egalladi.
Musobaqa g‘olibi va sovrindorlari viloyat hokimi o‘rinbosari Zafar Ro‘ziyev, Do‘stlik tumani hokimi Shavkat Darvishev va boshqa rasmiy mehmonlar tomonidan medallar va pul mukofotlari bilan taqdirlandi.
Bu musobaqa faqat sport natijasi emas. U yoshlar o‘rtasida sog‘lom turmush tarzi targ‘iboti, jamoaviylik va do‘stlik ruhini yanada mustahkamlashga xizmat qildi.
Do‘stlik tumani sport majmuasi bugun yana bir bor Jizzax futzalining yangi sahifasini ochdi. Mavsum yakunlangan bo‘lsa-da, bu g‘alabalar va mag‘lubiyatlar ortida yangi orzular, yangi intilishlar qolmoqda.