Bugun Do‘stlik tumanida 1-sonli davlat maktabgacha ta’lim tashkiloti hamda “Barkamol avlod” bolalar maktabining ochilish marosimi bo‘lib o‘tdi.
2025-12-01 17:10:00 / Yangiliklar
Tadbirda ta’lim sohasi vakillari, ota-onalar hamda jamoatchilik ishtirok etdi. Marosimda tuman hokimining o‘rinbosari Sanobar Qayumova so‘zga chiqib, mamlakatimizda bolalarni har tomonlama qo‘llab-quvvatlash, ular uchun zamonaviy ta’lim va tarbiya sharoitlarini yaratish borasida hayotga tatbiq etilayotgan islohotlarni alohida ta’kidladi. Shuningdek, mazkur tashabbuslar Do‘stlik tumanida ham izchil amalga oshirilayotgani, yangi muassasalar faoliyati yosh avlodning bilim va ko‘nikmalarini rivojlantirishda muhim ahamiyat kasb etishi qayd etildi.
Ta’kidlanganidek, Do‘stlik tumanida 3–6 yoshli bolalar soni jami 5973 nafarni tashkil etadi. Shundan 4782 nafar bola maktabgacha ta’lim bilan qamrab olingan bo‘lib, bu umumiy qamrovning 82 foizini tashkil qiladi.
Gʻafur Gʻulom MFY, U.Nosir ko‘chasida joylashgan 1-sonli DMTT 180 o‘ringa mo‘ljallangan bo‘lib, unda 5 ta asosiy guruh,
1 ta qisqa muddatli guruh, 1 ta majburiy maktabga tayyorlov guruhi faoliyat yuritadi.
Tashkilotda bolalar tarbiyasi va ta’limi bilan 14 nafar pedagog shug‘ullanadi. Ta’mirdan keyin bog‘chada bolajonlar uchun ham, tarbiyachilar uchun ham zarur barcha sharoitlar yaratib berildi.
“Barkamol avlod” bolalar maktabida hozirgi kunda 800 nafar o‘quvchi qamrab olingan.
Ushbu maskanda 25 ta to‘garak faoliyat yuritib, quyidagi yo‘nalishlar bo‘yicha o‘quvchilarga bilim va ko‘nikmalar berilmoqda:
-IT va robototexnika,
-xorijiy tillar,
-maktabgacha va oliy ta’limga tayyorlov kurslari,
-san’at va madaniyat,
-hunarmandchilik va qo‘l mehnati,
-sport yo‘nalishlari shular jamlasidandir.
Mazkur to‘garaklarda jami 35 nafar malakali pedagog faoliyat olib borib, yoshlarning iqtidori va qobiliyatini rivojlantirishga hissa qo‘shmoqda.
Muassasaning qisqa fursatlarda ta’mirdan chiqarilishi ishchi- xodimlarga ko‘tarinki kayfiyat bag‘ishladi.