“O‘zbekiston Respublikasi Kapital bozori” V xalqaro konferensiyasida Davaktiv agentligi vakillari ishtirok etdi
2023-09-07 12:00:00 / Rahbariyatning bayonotlari va nutqlari
Joriy yilning 7 sentyabr sanasida moliyaviy bozorlar bo‘yicha biznes konferensiyalarning yetakchi provayderi Cbonds-Congress va Investitsiya institutlari milliy uyushmasi tomonidan mamlakatimiz Kapital bozorini isloh qilish va uni jadal rivojlantirish istiqbollari muhokamasiga bag‘ishlangan “O‘zbekiston Respublikasi Kapital bozori” V xalqaro konferensiyasi tashkil qilindi.
Anʼanaga aylangan mazkur konferensiya kapital bozorini tartibga soluvchi masʼul organlar, mahalliy banklar, investitsiya va ishlab chiqarish kompaniyalari, shuningdek, xalqaro moliya institutlari, reyting agentliklari hamda ko‘plab ushbu soha ekspertlarini bir maqsadda birlashtirdi.
Mazkur tadbirda Davaktiv agentligi direktori o‘rinbosari Alisher Miraliyev ishtirok etib, o‘z maʼruzasida shaffof va raqamli tizim faoliyatiga o‘tish yo‘lida Davlat korxonalarining faoliyati to‘g‘risidagi yig‘ma hisobotni har yili oshkor qilish amaliyoti joriy etilganligi, endilikda, davlat ishtirokidagi korxonalarning kuzatuv kengashi aʼzoligiga nomzodlarni qabul qilish va davlat korxonalari rahbarlarini tayinlash tanlov asosida amalga oshirilishi haqida taʼkidlab o‘tdi.
Shu bilan birga, mustaqil O‘zbekiston tarixida ilk bor, davlat ishtirokidagi korxonalarni boshqarishning fundamental huquqiy asosiga aylangan “Davlat mulkini boshqarish to‘g‘risida”gi Qonunni qabul qilinganligi, qolaversa, korporativ boshqaruv yo‘nalishida muhim ahamiyatga ega yangi tahrirdagi korporativ boshqaruv qoidalari, axloq kodeksi va boshqa bir qator hujjatlar xalqaro ilg‘or tajribalar, shu jumladan Iqtisodiy hamkorlik va taraqqiyot tashkilotining korporativ boshqaruv rahbarlik tamoyillari asosida ishlab chiqilganligi hamda amaliyotga joriy etilganligini maʼlum qildi.
Bundan tashqari, mamlakatimiz iqtisodiyotida davlat ishtirokini qisqartirish, bunda xususiylashtirish dasturi va uni amalga oshirish bo‘yicha qilinayotgan islohotlar bilan konferensiya qatnashchilari batafsil tanishtirildi.
Tadbirda ishtirokchilar tomonidan xususiylashtirish sohasida amalga oshirilayotgan keng qamrovli islohotlar va erishilayotgan natijalar mamlakat kapital bozorini jadal rivojlantirish yo‘lida mustahkam poydevor bo‘lib xizmat qilishiga ishonch bildirildi.