“Avto Climate Control” MChJning ochiq savdo jarayonlari yuzasidan axborot
2025-05-20 12:30:00 / Yangiliklar
Davlat aktivlari agentligining joriy yil 24-apreldagi eʼloniga muvofiq, “Avto Climate Control” MChJ ustav kapitalidagi 100 foiz davlat ulushini (keyingi oʻrinlarda – “Aktiv”) ochiq savdo jarayonlarining Majburiyatga ega boʻlmagan takliflar (NBO) qabul qilish bosqichi boshlangan.
“Portfolio Investments” kompaniyasi (keyingi oʻrinlarda – “Konsultant”) mazkur xususiylashtirish jarayonlarini xalqaro tajriba asosida amalga oshirish maqsadida Davlat aktivlari agentligining xususiylashtirish boʻyicha konsultanti sifatida jalb qilingan.
Avval maʼlum qilinganidek, xususiylashtirish jarayonlarida kelgusidagi oʻz ishtirokini tasdiqlash uchun, talabgorlarga Konsultant tomonidan Aktivni sotib olish va uning kelgusidagi faoliyati boʻyicha asosiy shartlar aks ettirilgan “savdoning asosiy shartlari boʻyicha Bitim” (Term sheet) yetkazilgan va Majburiyatga ega boʻlmagan takliflar (NBO) qabul qilingan. Shuningdek, savdo jarayonlariga yanada koʻproq salohiyatli investorlarni jalb qilish maqsadida, Aktivni sotib olish boʻyicha qiziqish bildirish (Expression of Interest) boʻyicha arizalarni qabul qilish ishlari parallel ravishda davom ettirilgan.
Natijada, Konsultantga belgilangan muddatlarda 4 nafar investorlar tomonidan Majburiyatga ega boʻlmagan takliflar (NBO) kelib tushgan.
Konsultant tomonidan investorlar takliflari savdo jarayonining ushbu bosqichida belgilangan talablarga muvofiqligi oʻrganilgan hamda uning tavsiyasiga asosan barcha talabgorlar savdo jarayonlarining navbatdagi Majburiyatga ega boʻlgan takliflarni (BO) qabul qilish bosqichiga oʻtkazildi.
Shuningdek, Konsultant tomonidan barcha talabgorlarga jarayon xati “Process letter” orqali navbatdagi bosqich toʻgʻrisida batafsil maʼlumot yetkaziladi.
Navbatdagi bosqich toʻgʻrisida maʼlumot:
Majburiyatga ega boʻlgan takliflar (BO) bosqichiga oʻtgan talabgorlarga Konsultant tomonidan tayyorlangan Aktivning moliyaviy, soliq, huquqiy va ekologik kompleks tahliliy hisobotlari (due diligence) bilan tanishish uchun virtual maʼlumotlar xonasi (VDR)ga kirish imkoniyati yaratiladi. Bundan tashqari, ishtirokchilar bevosita Aktivga tashrif buyurish va ularning boshqaruv organi bilan uchrashish imkoniyatiga ega boʻladilar.
Konsultant tomonidan barcha ishtirokchilarga yuqoridagi kompleks tahlil hisobotlari bilan tanishishlari uchun yetarli imkoniyat yaratish maqsadida, Majburiyatga ega boʻlgan takliflar (BO) 2025-yil 20-iyun soat 23:59 ga qadar (Toshkent vaqti bilan) qabul qilinadi.
Shu bilan birga, mazkur muddatga qadar talabgorlar tomonidan “E-auksion” elektron savdo platformasida ochiladigan shaxsiy kabinetlari orqali Majburiyatga ega boʻlgan takliflarining kamida 1 foizini kafolatli toʻlov (zakalat) sifatida oʻtkazish talab etiladi. Bunda, mazkur kafolat toʻlovi (zakalat) jarayon yakunida ishtirokchilarga qaytariladi, xususiylashtirish jarayoni gʻolibi boʻlgan talabgorning kafolat toʻlovi (zakalati) – sotib olish toʻlovining bir qismi sifatida Xususiylashtirish jamgʻarmasiga oʻtkaziladi.
Shuningdek, mazkur bosqichda talabgorlar tomonidan taqdim etilayotgan qat'iy narx takliflari bo‘yicha toʻlov qobiliyatini tasdiqlovchi hujjatlar va/yoki kafolatlar talab etiladi.
“E-auksion” elektron savdo platformasida ochiladigan shaxsiy kabinet va hisob-raqam koʻrsatkichlari Konsultant tomonidan ishtirokchilarga yuboriladigan jarayon toʻgʻrisidagi individual xat (Process Letter) orqali yetkaziladi.
Davaktiv agentligi xususiylashtirish jarayoniga qiziqish bildirgan va arizalar topshirgan barcha ishtirokchilarga minnatdorchilik bildiradi hamda Majburiyatga ega boʻlmagan takliflar (NBO) qabul qilish bosqichidan muvaffaqiyatli oʻtgan talabgorlar bilan jarayonning navbatdagi bosqichida konstruktiv hamkorlikka ishonch bildiradi.
Diskleymer
Ushbu eʼlon yoki uning mazmunining biron-bir qismi mazkur eʼlon chop etilishidan kelib chiqib taxmin qilinishi mumkin boʻlgan Davlat aktivlari agentligi va “Portfolio Investments”ning Aktivlarni sotish bilan bogʻliq biror-bir shakldagi majburiyati sifatida talqin qilinmasligi kerak. Davlat aktivlari agentligi va “Portfolio Investments” oʻz xohishiga koʻra har qanday vaqtda va har qanday munosabatda, birgalikdagi yoki shaxsiy javobgarlikni oʻz zimmalariga olmasdan:
(i) arizalar berish muddatiga oʻzgartirish kiritish;
(ii) savdo jarayonlarining bosqichlari boʻyicha oʻzgartirish kiritish;
(iii) turli xil manfaatdor tomonlar uchun turli xil tartib-qoidalar boʻyicha ish tutish va/yoki Davlat aktivlari agentligi va “Portfolio Investments” tomonidan koʻzda tutilgan reja-jadval va tartib doirasida istalgan boshqa potensial xaridorni (xaridorlarni) oldindan ogohlantirmasdan chiqarib tashlagan holda bir yoki bir nechta potensial xaridorlar bilan muzokaralar olib borish;
(iv) har qanday sababga koʻra sotish jarayonini toʻxtatish;
(v) va/yoki istalgan vaqtda va sabablarni tushuntirmasdan Savdoga taalluqli boʻlgan har qanday potensial xaridor (xaridorlar) bilan har qanday muhokama va muzokaralarni tugatish huquqlarini oʻzida saqlab qoladi.
Davlat aktivlari agentligi sotish jarayonining ketma-ketligini oʻzgartirish yoki ishtirokchilar va potensial xaridorga (xaridorlarga) sotishni yoki sabablarini tushuntirmasdan istalgan vaqtda ular bilan muzokara olib borishni rad etish huquqini oʻzida saqlab qoladi.