Ayrim ijtimoiy tarmoqlardagi sahifalarda “Matbuotchilar uyi” boʻyicha bildirilgan fikrlarga Davaktiv agentligining rasmiy munosabati
2025-04-08 20:20:00 / Yangiliklar
Ijtimoiy tarmoqlarda Toshkent shahri Matbuotchilar koʻchasidagi 32-uy, yaʼni "Matbuotchilar uyi" goʻyoki jurnalistlarga emas, qandaydir investorga berilgani, egalik huquqi Oʻzbekiston Milliy axborot agentligidan (keyingi oʻrinlarda - OʻzA) olib qoʻyilgani toʻgʻrisida faraz va taxminlardan iborat boʻlgan va haqiqatga toʻgʻri kelmaydigan axborotlar tarqalmoqda.
Qayd etish joiz, Oʻzbekiston Respublikasi Prezidentining tegishli qarori bilan “Matbuot uyi” bino va inshootlari (Toshkent shahri, Mirobod tumani, Matbuotchilar koʻchasi, 32-uy) chindan ham OʻzAga operativ boshqaruv huquqi asosida berilgan.
Oʻzbekiston Respublikasi Prezidentining tegishli qarori bilan OʻzAga tegishli “Matbuot uyi” bino va inshootlari hamda unga tutash hududda zamonaviy “Media shaharcha” tashkil etilishi belgilangan.
Hozirgi kunda “Matbuot uyi” binosida demontaj ishlari yakuniga yetib, qurilish-montaj ishlarini amalga oshirish uchun loyiha-smeta hujjatlari ishlab chiqilgan.
Taʼkidlash joizki, hozirgi vaqtda “Matbuot uyi” bino va inshootlarini sotilishi nazarda tutilmagan va OʻzA mazkur binoni yagona balansda saqlovchisi hisoblanadi.
Shuningdek, “Matbuot uyi” bino va inshootlari hamda unga tutash hududda qisqa muddatlarda zamonaviy “Media shaharcha” tashkil etilib, barcha davriy bosma nashrlarning tahririyatlari mazkur binoga joylashtiriladi.