Davlat aktivlari agentligi xavfsizlik madaniyatini amaliy yondashuv orqali mustahkamlamoqda
2026-05-01 10:20:00 / Yangiliklar
Davlat aktivlarini boshqarish agentligi xodimlari Fuqaro muhofazasi instituti tomonidan tashkil etilgan amaliy o‘quv mashg‘ulotlarida ishtirok etdi. Mazkur tashabbus favqulodda vaziyatlarda harakat qilish ko‘nikmalarini rivojlantirish hamda zamonaviy xavfsizlik madaniyatini shakllantirishga qaratilgan.
Tashrif doirasida ishtirokchilarga O‘zbekistonda sodir bo‘lgan zilzilalar tarixi, ularning oqibatlari hamda xavflarni kamaytirish choralari haqida batafsil ma’lumot berildi. Shuningdek, jabrlanganlarga birinchi tibbiy yordam ko‘rsatish bo‘yicha muhim bilim va ko‘nikmalar shakllantirildi.
Amaliy mashg‘ulotlar doirasida virtual reallik texnologiyalari yordamida xodimlar yong‘inni bartaraf etish jarayonlarida ishtirok etib, real sharoitga yaqin vaziyatlarda qaror qabul qilish ko‘nikmalarini mustahkamladi. Maxsus “tutun xonasi”da esa cheklangan ko‘rish sharoitida xavfsiz evakuatsiya qilish bo‘yicha amaliy tajriba orttirildi.
Dastur yakunida ishtirokchilar Markaziy Osiyoda yagona bo‘lgan, 7,5 ballgacha kuchli zilzilani simulyatsiya qiluvchi maxsus qurilmada sinovdan o‘tdi. Ushbu tajriba ularga tabiiy ofatlarning real ta’sirini his qilish va to‘g‘ri harakat qilish algoritmlarini amalda qo‘llash imkonini berdi.
Mazkur o‘quv mashg‘ulotlari xodimlarning favqulodda vaziyatlarda to‘g‘ri va tezkor harakat qilish ko‘nikmalarini mustahkamlash, shuningdek, xavfsizlik bo‘yicha amaliy bilimlarini oshirishga xizmat qiladi.