Oʻzbekiston Respublikasi Davlat aktivlarini boshqarish agentligi

Davlat aktivlarini boshqarish agentligida O‘zbekiston Respublikasi Prezidentining 2025-yil 18-dekabrdagi PF-252-son “Davlat auditi va moliyaviy nazorati faoliyatini yanada takomillashtirishga doir qo‘shimcha chora-tadbirlar to‘g‘risida”gi Farmoni ijrosini ta’minlash doirasida o‘quv seminar tashkil etildi.

Mazkur Farmonga muvofiq, vazirlik va idoralarda Hisob palatasining vakili sifatida bosh inspektor faoliyati yo‘lga qo‘yilgan bo‘lib, uning asosiy vazifalari byudjet qonunchiligi buzilishlarining oldini olish, moliyaviy xavflarni baholash, mablag‘lardan foydalanish samaradorligini tahlil qilish hamda davlat xaridlarida qonuniylikni ta’minlashdan iborat.

Seminar Davlat aktivlarini boshqarish agentligi direktorining birinchi o‘rinbosari Nodir Xusanov boshchiligida o‘tkazilib, Hisob palatasi bosh inspektori Ilyor Ergashev tomonidan olib borildi. Unda Davlat aktivlari agentligi tizimidagi moliyaviy masalalar bo‘yicha o‘rinbosarlari, bosh hisobchilar, iqtisodchilar, shuningdek, xaridlar, komplayens va ichki audit xizmatlari mas’ullari ishtirok etdi.

Tadbirda davlat moliyaviy nazoratini yangi bosqichga olib chiqish, xususan “aniqlash emas, oldini olish” tamoyilini keng joriy etish masalalari muhokama qilindi. Shuningdek, byudjet qonunchiligiga qat’iy rioya etish, moliyaviy xavflarni barvaqt aniqlash, davlat mablag‘laridan samarali va maqsadli foydalanish yuzasidan amaliy tushuntirishlar berildi. Bundan tashqari, davlat xaridlari jarayonlarida shaffoflik va qonuniylikni ta’minlash, korrupsiyaviy omillarni kamaytirish hamda moliyaviy intizomni mustahkamlash bo‘yicha tavsiyalar bildirildi.

Mazkur o‘quv seminari davlat moliyaviy nazorati tizimini yanada takomillashtirish, ochiqlik va shaffoflikni oshirish hamda byudjet mablag‘laridan foydalanish samaradorligini ta’minlashga xizmat qiladi.