Avtomobil sanoati va xususiylashtirish sohasida hamkorlikni kengaytirish masalalari muhokama qilindi
2026-04-22 11:00:00 / Yangiliklar
2026-yil 21-aprel kuni Davlat aktivlarini boshqarish agentligi direktori Sohibjon Murodov hamda GM International kompaniyasining vitse-prezidenti Tommi Hosea ishtirokida uchrashuv boʻlib oʻtdi.
Muzokaralar davomida tomonlar avtomobil sanoatidagi ikki tomonlama hamkorlikning joriy holatini atroflicha tahlil qildi. Xususan, amalga oshirilayotgan qoʻshma loyihalarning ijrosi, erishilgan amaliy natijalar hamda sohani yanada rivojlantirishning ustuvor yoʻnalishlari yuzasidan fikr almashildi.
Shuningdek, yangi xususiylashtirish dasturi doirasida investitsiyaviy jozibadorligi yuqori boʻlgan davlat aktivlarini xususiylashtirish jarayonlariga xorijiy investorlarni, jumladan, AQSH biznes doiralarini faol jalb etish masalalariga alohida eʼtibor qaratildi. Tomonlar ushbu yoʻnalishda hamkorlikni kengaytirish, investorlar uchun qulay va barqaror ishbilarmonlik muhitini shakllantirish, shuningdek, ochiqlik va shaffoflik tamoyillarini izchil taʼminlash muhimligini taʼkidladi.
Uchrashuv yakunida tomonlar hamkorlikni izchil davom ettirish, amalga oshirilayotgan loyihalar samaradorligini oshirish, oʻzaro muloqotni yanada faollashtirish hamda sohadagi mavjud imkoniyatlardan samarali foydalanishga kelishib oldi.