Yengil sanoat sohasi uchun nufuzli kasbiy adabiyotlar o‘zbek tiliga tarjima qilindi.
2026-08-24 18:50:00 / Yangiliklar
O‘zbekiston Respublikasi Prezidentining 2026-yil 15-yanvardagi PQ–9-son qarori ijrosi doirasida Yengil sanoatni rivojlantirish agentligi tomonidan soha mutaxassislari uchun zamonaviy bilim va ilg‘or xalqaro tajribalarni o‘zbek tilida ommalashtirish yo‘lida muhim qadam tashlandi.
Agentlik tashabbusi bilan Hindistonning Javoharlal Neru universiteti Fors va Markaziy Osiyo tadqiqotlari markazi hamda Doro Shukuh ilmiy-tadqiqot jamg‘armasi bilan hamkorlikda yengil sanoat yo‘nalishidagi dunyo miqyosida e’tirof etilgan nufuzli adabiyotlar orasidan 3 ta kasbiy kitob tanlab olinib, ilk bor o‘zbek tiliga tarjima qilindi.
Ushbu nashrlarda texnik to‘qimachilik, zamonaviy muhandislik yechimlari, innovatsion texnologik jarayonlar va ilg‘or ishlab chiqarish tajribalari jamlangan bo‘lib, ular soha mutaxassislari, muhandislar, tadqiqotchilar, talabalar va tadbirkorlar uchun muhim amaliy bilim manbai bo‘lib xizmat qiladi.
Bu tashabbus shunchaki xorijiy adabiyotlarni tarjima qilish emas, balki jahon miqyosidagi ilg‘or bilimlarni milliy sanoatimizga olib kirish, ilm-fan va ishlab chiqarish o‘rtasidagi integratsiyani kuchaytirish hamda yangi avlod malakali mutaxassislarini tayyorlashga qaratilgan strategik qadamdir.
2026-yil avgust oyida Nyu-Dehli shahridagi Javoharlal Neru universitetida “Sanoat to‘qimachiligi: Muhandislik yechimlari va texnologik jarayonlar” (Technical Textiles: Engineering Solutions and Technological Processes) nashri doirasidagi tashabbus uchun O‘zbekiston Respublikasi Vazirlar Mahkamasi huzuridagi Yengil sanoatni rivojlantirish agentligi nufuzli “Book of the Year Award of Honor” mukofoti bilan taqdirlandi.
Mukofot Agentlikning sanoat innovatsiyalari, muhandislik yechimlari, to‘qimachilik ilmi va zamonaviy ishlab chiqarish jarayonlarini rivojlantirishga qo‘shayotgan hissasining xalqaro e’tirofi sifatida taqdim etildi.
Mazkur natija O‘zbekistonda yengil sanoatni faqat ishlab chiqarish hajmlari bilan emas, balki bilim, ilm-fan, innovatsiya va yuqori malakali kadrlar asosida rivojlantirishga qaratilgan yangi yondashuvning amaliy ifodasidir.
Jahon bilimlarini o‘zbek tilida soha vakillariga yetkazish — raqobatbardosh, innovatsion va bilimga asoslangan yengil sanoatni shakllantirish sari muhim qadamdir.
Manba: https://suz.co.in/