BCI sertifikati — xalqaro bozorga chiqish va eksport imkoniyatlarini kengaytirish vositasi
2026-08-21 16:10:00 / Yangiliklar
Joriy yilning 21-avgust kuni Toshkent shahrida O'zbekiston Respublikasi Vazirlar Mahkamasi huzuridagi Yengil sanoatni rivojlantirish agentligi bilan hamkorlikda “BCI kelajagini birgalikda shakllantiramiz” strategik sessiyasi bo‘lib o‘tdi. Tadbirni Agentlik direktorining birinchi o‘rinbosari Baxtiyor Muxammadsaidov ochib berdi.
Sessiyada BCI’ning O‘zbekistonda 2030-yilgacha rivojlanish strategiyasi, ishlab chiqaruvchilar va bozor ehtiyojlari, sohadagi mavjud masalalar hamda kelgusidagi hamkorlik yo‘nalishlari muhokama qilindi.
Tadbir doirasida Better Cotton standartlari talablariga muvofiqligini tasdiqlagan “Fergana Global Textile”, “Sultan Tex Group”, “Deniz Teks”, "Navbakhor Textile" va “Zelal Tekstil” korxonalariga Better Cotton sertifikatlari tantanali ravishda topshirildi.
BCI sertifikati tadbirkor uchun xalqaro xaridorlar ishonchini mustahkamlash, global ta’minot zanjirlariga integratsiyalashish, yangi xaridorlar bilan ishlash va eksport raqobatbardoshligini oshirishga xizmat qiluvchi muhim biznes vositasidir.
Agentlik BCI bilan hamkorlikda sertifikatlash qamrovini kengaytirish, klasterlarni xalqaro standartlarga tayyorlash va o‘zbek mahsulotlarining jahon bozoridagi mavqeini mustahkamlash bo‘yicha tizimli ishlarni davom ettiradi.