To‘qimachilik, ipakchilik va charm-poyabzal sanoati vakillari bilan ochiq muloqot o‘tkazildi
2026-06-05 14:25:00 / Yangiliklar
2026-yil 5-iyun kuni O‘zbekiston–Koreya o‘quv-amaliy to‘qimachilik texnoparkida O‘zbekiston Respublikasi Vazirlar Mahkamasi huzuridagi Yengil sanoatni rivojlantirish agentligi direktorining o‘rinbosari Ruxullo Zikrillayev tomonidan to‘qimachilik, ipakchilik hamda charm-poyabzal sanoati sohalarida faoliyat yuritayotgan tadbirkorlar va ishlab chiqaruvchilar bilan ochiq muloqot tashkil etildi.
Tadbir davomida ishlab chiqarish va eksport faoliyatini amalga oshirish jarayonida yuzaga kelayotgan dolzarb masalalar muhokama qilinib, ularning amaliy yechimlari yuzasidan fikr almashildi.
Xususan, ishlab chiqarish obyektlarini qurish uchun ruxsatnomalar olish, loyihalarni vakolatli davlat organlari bilan kelishish tartib-taomillarini takomillashtirish, ijara munosabatlari, ishlab chiqarish quvvatlarini kengaytirish hamda ishlab chiqarish maydonlaridan samarali foydalanish masalalari ko‘rib chiqildi.
Shuningdek, bojxona rasmiylashtiruvi va logistika yo‘nalishidagi mavjud muammolar, yuklarni tashqi bozorlarga yetkazib berish muddatlarini qisqartirish hamda logistika zanjirlarini takomillashtirish bo‘yicha tadbirkorlarning takliflari tinglandi.
Muloqot yakunida bildirilgan barcha murojaat va takliflar atroflicha o‘rganilib, tegishli vazirlik va idoralar bilan hamkorlikda amaliy choralar ko‘rish bo‘yicha mas’ullarga topshiriqlar berildi.
Agentlik tomonidan tadbirkorlar bilan ochiq va konstruktiv muloqotni davom ettirish, mavjud muammolarni tezkor hal etish hamda mahalliy ishlab chiqaruvchilar uchun qulay shart-sharoitlar yaratish ustuvor vazifa sifatida belgilangan.