ПМЭФ–2026 doirasida xalqaro hamkorlikni rivojlantirishga qaratilgan uchrashuvlar o‘tkazildi
2026-06-04 18:10:00 / Yangiliklar
2026-yil 4-iyun kuni Sankt-Peterburg shahrida o‘tkazilayotgan XXIX Peterburg xalqaro iqtisodiy forumi (ПМЭФ–2026) doirasida O‘zbekiston Respublikasi Vazirlar Mahkamasi huzuridagi Yengil sanoatni rivojlantirish agentligi direktorining birinchi o‘rinbosari Baxtiyor Muxammadsaidov qator xalqaro uchrashuvlar o‘tkazdi.
Jumladan, Braziliya Federativ Respublikasi Qishloq xo‘jaligi vaziri Luiz Rua bilan bo‘lib o‘tgan uchrashuvda Braziliya paxtasidan O‘zbekiston to‘qimachilik sanoatida foydalanish imkoniyatlari hamda ikki davlat o‘rtasidagi hamkorlikni kengaytirish masalalari muhokama qilindi. Suhbat yakunida vazir janoblari O‘zbekistonga tashrif buyurishga taklif etildi.
Saudiya Arabistonining “Walmalki” kompaniyasi vitse-prezidenti Valid Ali Almalki bilan muzokaralarda O‘zbekistondagi to‘qimachilik korxonalarida quyosh panellarini o‘rnatish bo‘yicha hamkorlik istiqbollari ko‘rib chiqildi. Kompaniya vakili joriy yil avgust oyida O‘zbekistonga tashrif buyurishga qiziqish bildirdi.
Tanzaniyaning “ICT” kompaniyasi bosh direktori doktor Nkundwe Moses Mwasaga bilan o‘tkazilgan uchrashuvda Afrika bozori uchun tayyor to‘qimachilik mahsulotlarini ishlab chiqarish va eksport qilish yo‘nalishlarida ikki tomonlama hamkorlik imkoniyatlari muhokama qilindi.
Eronning “RUNEXT” kompaniyasi vakillari bilan bo‘lib o‘tgan muzokaralarda o‘zaro hamkorlik aloqalarini yo‘lga qo‘yish hamda qo‘shma loyihalarni amalga oshirish istiqbollari yuzasidan fikr almashildi.
Tatariston Respublikasi Kanop ishlab chiqaruvchilar uyushmasi prezidenti Dinar Shakirzyanov bilan uchrashuv davomida kanop xomashyosini yetishtirish va qayta ishlash sohasidagi hamkorlik masalalari muhokama qilindi.
Muzokaralar yakunida kanop xomashyosini yetkazib berish hamda uni O‘zbekistondagi “Navbahor Textile” korxonasi bilan kooperatsiya asosida qayta ishlash bo‘yicha hamkorlik aloqalarini o‘rnatishga kelishib olindi. Shuningdek, Dinar Shakirzyanov joriy yil oktyabr oyida O‘zbekistonda bo‘lib o‘tadigan xalqaro to‘qimachilik ko‘rgazmasida ishtirok etish niyatini bildirdi.
O‘tkazilgan uchrashuvlar yengil sanoat tarmog‘iga investitsiyalarni jalb etish, xalqaro hamkorlikni kengaytirish hamda yangi istiqbolli loyihalarni amalga oshirishga xizmat qiladi.