O‘zbekiston mahsulotlarini Serbiya bozoriga eksport qilish masalalari muhokama qilindi
2026-05-26 15:10:00 / Yangiliklar
2026-yil 26-may kuni O‘zbekiston Respublikasi Vazirlar Mahkamasi huzuridagi Yengil sanoatni rivojlantirish agentligi direktori Nozimjon Xolmurodov boshchiligidagi delegatsiyaning Serbiya Respublikasiga amalga oshirayotgan tashrifi doirasida Serbiya Hukumati xalqaro iqtisodiy hamkorlik bo‘yicha vaziri Nenad Popovich bilan uchrashuv bo‘lib o‘tdi.
Uchrashuv davomida ikki tomonlama savdo-iqtisodiy hamkorlikni rivojlantirish, xususan, O‘zbekistonda ishlab chiqarilayotgan xomashyo, ip-kalava va tayyor bo‘yalgan matolarni Serbiya bozoriga yetkazib berish masalalari muhokama qilindi.
Shuningdek, Serbiya hududida Yevropa bozoriga yo‘naltirilgan yengil sanoat ishlab chiqarish quvvatlarini tashkil etish, qo‘shma korxonalarni yo‘lga qo‘yish hamda logistika va eksport zanjirlarini rivojlantirish istiqbollari yuzasidan fikr almashildi.
Muzokaralar davomida Serbiya tomoni tomonidan o‘zbekistonlik investorlarni davlat tomonidan qo‘llab-quvvatlash mexanizmlari, jumladan, soliq imtiyozlari, sanoat zonalari imkoniyatlari va investitsion preferensiyalar haqida ma’lumot berildi.
Tomonlar mazkur yo‘nalishdagi amaliy hamkorlikni kengaytirish, sanoat kooperatsiyasini mustahkamlash hamda Yevropa bozorlariga birgalikda chiqish bo‘yicha kelgusidagi hamkorlik istiqbollarini muhokama qildilar.