OʻZBEKISTON RESPUBLIKASI VAZIRLAR MAHKAMASI HUZURIDAGI YENGIL SANOATNI RIVOJLANTIRISH AGENTLIGI

2026-yil 6-may kuni O‘zbekiston Respublikasi Vazirlar Mahkamasi huzuridagi Yengil sanoatni rivojlantirish agentligi direktori Nozimjon Xolmurodov hamda Hong Kong Monetary Authority (HKMA) mas’ullari o‘rtasida uchrashuv bo‘lib o‘tdi.

Muzokaralar davomida O‘zbekiston yengil sanoat korxonalarining eksport salohiyatini moliyaviy qo‘llab-quvvatlashga qaratilgan qator ustuvor yo‘nalishlar muhokama qilindi:

— Gonkong banklari va moliyaviy institutlari orqali eksportga yo‘naltirilgan korxonalar uchun imtiyozli kreditlash mexanizmlarini yo‘lga qo‘yish;
— Eksport buyurtmalari asosida moliyalashtirish (order-based financing) tizimini joriy etish imkoniyatlari;
— O‘zbek va Xitoy kompaniyalari o‘rtasida savdoni moliyalashtirish instrumentlaridan samarali foydalanish orqali o‘zaro ishonchni mustahkamlash;
— Eksportyorlar uchun pilot kredit liniyasini yaratish va uni bosqichma-bosqich kengaytirish istiqbollari.

Ma’lumot uchun: Hong Kong Monetary Authority (HKMA) — Gonkongning markaziy bank funksiyalarini bajaruvchi moliyaviy regulyatori bo‘lib, bank tizimi barqarorligini ta’minlash hamda xalqaro moliya markazi sifatida hududning raqobatbardoshligini oshirishga xizmat qiladi.

Uchrashuv yakunida tomonlar ilg‘or moliyaviy yechimlarni joriy etish orqali O‘zbekiston yengil sanoati eksportini rag‘batlantirish va xalqaro moliya institutlari bilan hamkorlikni yanada kengaytirishdan manfaatdor ekanliklarini ta’kidladilar.