O‘zbekiston–Gonkong iqtisodiy forumi doirasida milliy mahsulotlar ko‘rgazmasi tashkil etildi
2026-05-06 16:20:00 / Yangiliklar
Joriy yilning 6-may kuni Xitoy Xalq Respublikasining Gonkong shahrida O‘zbekiston Respublikasi Bosh vaziri Abdulla Aripov boshchiligidagi delegatsiyaning davlat tashrifi amalga oshirilmoqda. Mazkur tashrifda O‘zbekiston Respublikasi Vazirlar Mahkamasi huzuridagi Yengil sanoatni rivojlantirish agentligi direktori Nozimjon Xolmurodov ham ishtirok etmoqda.
Tashrif doirasida tashkil etilgan O‘zbekiston–Gonkong iqtisodiy forumida ikki tomonlama savdo-iqtisodiy hamkorlikni mustahkamlash, investitsiyalar hajmini oshirish hamda istiqbolli biznes loyihalarni amalga oshirish masalalari muhokama qilinmoqda.
Forum doirasida milliy mahsulotlar ko‘rgazmasi tashkil etildi. Ko‘rgazmada O‘zbekistonning turli hududlaridan tashrif buyurgan 150 ga yaqin tadbirkor va ishlab chiqaruvchilar o‘z mahsulotlari bilan ishtirok etdilar.
Tadbir davomida yengil sanoat, to‘qimachilik, charm-poyabzal, hunarmandchilik hamda eksportbop mahsulotlar namoyish etilib, xorijiy hamkorlar va investorlar tomonidan katta qiziqish bildirildi.
Ko‘rgazma mamlakatimiz ishlab chiqaruvchilarining eksport salohiyatini kengaytirish, yangi xalqaro hamkorlik aloqalarini yo‘lga qo‘yish hamda O‘zbekiston mahsulotlarini Osiyo bozorlarida faol targ‘ib etish uchun muhim platforma vazifasini o‘tamoqda.
Shuningdek, tadbir doirasida qator B2B uchrashuvlar, muzokaralar va istiqbolli hamkorlik loyihalari yuzasidan fikr almashuvlar tashkil etildi.
Mazkur forum O‘zbekiston va Gonkong o‘rtasidagi iqtisodiy sheriklikni yangi bosqichga olib chiqish hamda o‘zaro manfaatli investitsiyaviy hamkorlikni mustahkamlashga xizmat qilishi kutilmoqda.