Chekka hududda yangi imkoniyat: Dehqonobodda tikuvchilik markazi ish boshladi
2026-04-16 18:05:00 / Yangiliklar
Prezidentimiz Shavkat Mirziyoyev tomonidan ilgari surilgan manzilli ishlash siyosati doirasida Yengil sanoatni rivojlantirish agentligi tomonidan “Yengil sanoat tajriba tikuvchilik markazi” tashkil etildi. Mazkur markaz uchun bo‘sh turgan bino ta’mirlanib, zamonaviy tikuv mashinalari bilan jihozlandi hamda hunar o‘rganishni istagan qizlarga tikuv mashinalari sertifikatlari topshirildi.
Ushbu tashabbus nafaqat xotin-qizlarning bandligini ta’minlash, balki ularning daromad manbaini yaratish, oilaviy farovonlikni oshirishga xizmat qilmoqda. Shu bilan birga, hudud yoshlari tomonidan bildirilgan ehtiyojlar asosida boshqa yo‘nalishlarda ham amaliy choralar ko‘rilmoqda.
Bekobod tumanining Dehqonobod, Bobur Mirzo va Istiqbol MFYlari Respublikamizning chegara hududida joylashgan olis qishloqlar hisoblanadi. Ayniqsa, Dehqonobod qishlog‘ining tuman markazidan uzoqligi yoshlar bandligini ta’minlashni dolzarb masalaga aylantirgan.
Amalga oshirilgan ishlar natijasida Agentlikka biriktirilgan 40 nafar yoshning 5 nafari doimiy ish bilan ta’minlandi, 18 nafari o‘zini o‘zi band qilish uchun subsidiya asosida uskunalar oldi, 3 nafari harbiy xizmatga, 5 nafari tartibli mehnat migratsiyasiga yo‘naltirildi hamda 2 nafari zamonaviy kasb-hunarga jalb etildi.
Yangi tashkil etilgan tikuvchilik markazi — hudud yoshlarini qo‘llab-quvvatlash, ularni kasbga yo‘naltirish va barqaror daromad manbai yaratish yo‘lidagi muhim qadamdir.