Paxta-to‘qimachilik klasterlari, to‘qimachilik hamda tikuv-trikotaj korxonalari tadbirkorlari bilan uchrashuv bo'lib o'tdi
2026-03-12 18:35:00 / Yangiliklar
O‘zbekiston Respublikasi Vazirlar Mahkamasi huzuridagi Yengil sanoatni rivojlantirish agentligi tomonidan paxta yetishtirishdan boshlab tayyor mahsulot ishlab chiqarishgacha bo‘lgan qayta ishlash zanjirida yuzaga kelayotgan muammolarni muhokama qilishga bag‘ishlangan uchrashuv tashkil etildi.
Toshkent shahridagi O‘zbekiston–Koreya o‘quv-amaliy texnoparkida o‘tkazilgan ushbu tadbirda, Prezident Administratsiyasi vakillari, mutasaddi vazirlik va idoralar, paxta-to‘qimachilik klasterlari, to‘qimachilik hamda tikuv-trikotaj korxonalari rahbarlari ishtirok etdi.
Uchrashuv davomida tadbirkorlar tomonidan sohada mavjud ayrim tizimli muammolar, ishlab chiqarish jarayonidagi to‘siqlar hamda amaliyotda uchrayotgan masalalar ochiq va tanqidiy ruhda muhokama qilindi.
Muhimi, tadbirkorlar tomonidan ko‘tarilgan masalalarning aksariyati yuzasidan tegishli vazirlik va idoralar bilan birgalikda aniq yechimlar ishlab chiqildi hamda ularni amaliyotga joriy etish bo‘yicha kelishuvlarga erishildi.
Mazkur uchrashuv yengil sanoat tarmog‘ida ishlab chiqarish zanjirining samaradorligini oshirish, tadbirkorlar faoliyatini qo‘llab-quvvatlash hamda mavjud muammolarni tezkor hal etishga qaratilgan ochiq muloqot maydoniga aylandi.