Tojikiston Respublikasi Soʻgʻd viloyati delegatsiyasining Namanganga tashrifi davom etmoqda
2025-02-06 18:35:00 / Yangiliklar
Bir mahallar ajriq bosgan adirlik yerlarida bugun shunday bogʻlar tashkil etilgani zamirida katta mehnat mujassam. “Gold Fresh Ftuts” MCHJ ixtiyoridagi 750 gektar maydonning 450 gektari giloszor, 100 gektari hurmozor, 50 gektarida shaftoli, 70 gektarida olhoʻri koʻchatlari parvarishlanmoqda.
Birgina 2024-yilda 1000 tonnadan ortiq sarxil mevalar Dubay, Qatar, Rossiya, Koreya, Xitoy kabi davlatlarga eksport qilindi. Bu yerda 180 nafar doimiy, 3000 nafar mavsumiy ishchilar bandligi taʼminlangan.
Endilikda jamiyatning eksport salohiyati oshib, 300 ming dona koʻchatlar yetishtirilyapti va yuz foiz xorijga yuboriladi. 2 gektarlik issiqxonada ertapishar gilos va qulupnoy baravj oʻsmoqda.
Shu yerda mehmonlarga qishloq xoʻjaligi sohasida xizmat koʻrsatish, oʻsimliklar karantini boʻyicha batafsil maʼlumotlar berildi.
Soʻgʻd viloyati raisi Rajabboy Axmadzoda ayni yoʻnalishdagi tajribani chuqur oʻrganish lozimligini taʼkidladi.
Mehmonlarga Namangan viloyati hokimi Shavkatjon Abdurazzoqov, Tojikiston Respublikasining Oʻzbekistondagi favqulodda va muxtor elchisi Abdujabbor Aziz Rahmonzoda hamrohlik qilmoqdalar.
Namangan viloyati hokimligi
Axborot xizmati