O‘zbekiston Respublikasi Madaniyat vazirligi

Toshkent shahar                                             24-oktyabr, 2024-yil                                                      

 

Bugun poytaxtdagi Yoshlar ijod saroyida “Xalqaro madaniy meros haftaligi” doirasida Madaniyat vazirligi tomonidan “Yangi O‘zbekistonda madaniyat va san’at sohasidagi islohotlar” mavzusida  xalqaro forum bo‘lib o‘tdi.

 

Forumni Madaniyat vaziri Ozodbek Nazarbekov kirish nutqi bilan ochib berib, “Yangi O‘zbekistonda madaniyat va san’at sohasidagi amalga oshirilayotgan islohotlar” to‘g‘risida taqdimot qildi.

 

“Bizning ajdodlarimiz hamisha jaholatga qarshi ma’rifat bayrog‘ini baland ko‘tarib, o‘z aql-zakovati va salohiyatini ilm-fan, madaniyat rivojiga bag‘ishlaganlar. Lekin, shu o‘rinda, bir muhim jihatga alohida urg‘u berib o‘tishni istardim. Bu tabarruk zamindan Xorazmiylar, Farg‘oniy, Beruniy yoki Zamahshariylar o‘z-o‘zidan yetishib chiqmagan. Navoiy yoki Bobur Mirzo birdaniga buyuk shoir bo‘lib tug‘ilib qolmagan. O‘sha davrlardagi ilmiy-madaniy muhit jamiyatga ayni mana shunday buyuk shaxslarni, dunyo tan olgan olimu fuzalolarni yetishtirib bergan. Shu ma’noda, bugun O‘zbekistonda Hurmatli Prezidentimiz Shavkat Miromonovich Mirziyoyev boshchiliklarida ilm-fan, madaniyat, san’at, adabiyot rivojiga juda katta e’tibor qaratilmoqda. “Jaholatga qarshi ma’rifat” g‘oyasi asosida aholi, ayniqsa, yoshlarning ma’naviy-mafkuraviy immunitetini yuksaltirish, yurtimizdagi tinchlik-xotirjamlikni mustahkamlash yo‘lida izchil sa’y-harakatlar olib borilmoqda” – dedi vazir Ozodbek Nazarbekov.

 

Forumda xalqaro tashkilotlardan  TURKSOY Bosh kotibi Sulton Rayev, Turkiy Parlament Assambleyasi Bosh kotibi Mehmet Sureyya Er, Turkiy madaniyat va meros jamg‘armasi prezidenti Aktoti Raimkulova, shuningdek, Ozarbayjonda xizmat ko‘rsatgan madaniyat xodimi, taniqli yozuvchi va publist O‘g‘uz Yunus Isahon o‘g‘li, TURKSOY Yozuvchilar uyushmasi raisi, qozoq shoiri, jurnalist va muharriri, Qozog‘istonda xizmat ko‘rsatgan xodim Esdaulet Uluqbek, Qirg‘iziston xalqining “Muras” tarixiy-madaniy merosi jamg‘armasi raisi, taniqli tarixchi, publisist va jurnalist Moldokasimov Qiyos, Qozon davlat madaniyat instituti rektori Axmadiyeva Roza Shayxaydarovna,  Ege universiteti Adabiyot fakulteti Turk tili va adabiyoti kafedrasi mudiri Fedekar Selami o‘z  ma’ruzalari bilan ishtirok etishdi. Shu bilan birga, Forumda IKOMOS eksperti Kristina Iamandi hamda Fransiya shaharsozlik unversiteti katta eksperti Erik Xyubert onlayn tarzda ishtirok etishdi.

 

“Prezident Shavkat Mirziyoyev janobi oliylarining Yangi O‘zbekistonning me’mori sifatida uzoqni ko‘zlab amalga oshirayotgan ishlari — mamlakatni suratan va siyratan yangilash, dunyoda uning yangi imijini yaratish, xalqni azaliy orzulari ro‘yobi sari yetaklash hamda milliy qadriyatlardan suv ichgan demokratik islohotlar o‘zbekistonliklarning nafaqat hayotini, balki ongu tafakkurini ham o‘zgartirmoqda, desak, ayni haqiqat. Davlat rahbari tomonidan olib borayotgan konstruktiv va pragmatik tashqi siyosat O‘zbekistonning Markaziy Osiyoda hamda turkiy dunyoda azaliy o‘rnini qayta tiklashi va mustahkamlashida muhim o‘rin tutmoqda. O‘zbekiston Turkiy davlatlar tashkilotiga to‘laqonli a’zo bo‘lib kirganidan so‘ng barcha sohalar singari TURKSOY faoliyati doirasidagi hamkorlik aloqalari ham yangi bosqichga ko‘tarildi. Barcha a’zo davlatlarda bo‘lgani kabi O‘zbekistonda ham turkiy mamlakatlar madaniyati va san’ati kunlari, yoshlar va teatr festivallari, ijodiy forumlar uyushqoqlik bilan o‘tkazilmoqda” – dedi  Sulton Rayev nutqi davomida.

 

“Yangi O‘zbekistonda madaniyat va san’at sohasidagi islohotlar” xalqaro forumi doirasida O‘zbekiston Respublikasi Prezidenti tomonidan ilgari surilgan “Tirik tarix” loyihasi taqdimoti, Turkiy madaniyat va meros jamg‘armasi tomonidan chop etilgan “Turkiy tilli davlatlar milliy musiqa cholg‘ulari” kitobi taqdimoti, O‘zbek milliy cholg‘ulari ko‘rgazmasi hamda “Cho‘lpon” spektakli namoyishi bo‘lib o‘tdi. Forum doirasidagi tadbirlar dastur asosida (dastur ilova qilinadi) kun davomida bo‘lib o‘tdi.

 

“XALQARO MADANIY MEROS HAFTALIGI” doirasida Madaniyat vazirligi tomonidan tashkil etiladigan “YANGI O‘ZBEKISTONDA MADANIYAT VA SAN’AT SOHASIDAGI ISLOHOTLAR” xalqaro forumi DASTURI

Taklif etilayotgan ishtirokchilar soni: jami: 100 kishi, shundan 10 xorijiy, 90 mahalliy

24 oktyabr
10.00-10.20	-	“Yangi O‘zbekistonda madaniyat va san’at sohasidagi islohotlar” xalqaro forum ochilish marosimi: - madaniyat va san’at sohasida amalga oshirilayotgan islohotlar haqida video lavha; Moderator Sirojiddin O‘sarov chiqishi, tadbir to‘g‘risida qisqa ma’lumot berilishi.
10.20 – 10.40	-	Madaniyat vaziri O.Nazarbekovni “Yangi O‘zbekistonda madaniyat va san’at sohasidagi amalga oshirilayotgan islohotlar” to‘g‘risidagi taqdimoti
10.40 – 11.10	-	Xalqaro ekspertlarni ma’ruzalari: TURKSOY Bosh kotibi Sulton Rayev ma’ruzasi; Turkiy Parlament Assambleyasi Bosh kotibi MEHMET Sureyya Er ma’ruzasi;  Turkiy madaniyat va meros jamg‘armasi prezidenti Aktoti Raimkulova ma’ruzasi;
11.10 – 11.30	-	Turkiy madaniyat va meros jamg‘armasi tomonidan chop etilgan “Turkiy tilli davlatlar milliy musiqa cholg‘ulari” kitobi taqdimoti So‘zga chiquvchilar: Turkiy madaniyat va meros jamg‘armasi prezidenti Aktoti Raimkulova Madaniyat vaziri O.Nazarbekov O‘zbekiston davlat konservatoriyasi kafedra mudiri Sh.Ganixanova
11.30 – 12.00	-	Kofe-breyk
12.00 – 12.50		Xalqaro ekspertlarni ma’ruzalari: Ozarbayjonda xizmat ko‘rsatgan madaniyat xodimi, taniqli yozuvchi va publist O‘g‘uz Yunus Isahon o‘g‘li – “O‘zbekiston – Ozarbayjon o‘rtasidagi madaniy aloqalari”; TURKSOY Yozuvchilar uyushmasi raisi, qozoq shoiri, jurnalist va muharrir, Qozog‘istonda xizmat ko‘rsatgan xodim Esdaulet Uluqbek – “Madaniy meros Turkiston birligining xalqasidir”; Qirg‘iziston xalqining “Muras” tarixiy-madaniy merosi jamg‘armasi raisi, taniqli tarixchi, publisist va jurnalist Moldokasimov Qiyos – “O‘zbek – qirg‘iz xalqlari o‘rtasidagi tarixiy va madaniy aloqalar”; Qozon davlat madaniyat instituti rektori Axmadiyeva Roza Shayxaydarovna ma’ruzasi; Ege universiteti Adabiyot fakulteti Turk tili va adabiyoti kafedrasi mudiri Fedekar Selami  - “O‘zbekiston nomoddiy madaniy merosi va umuminsoniy qadriyatlar”.
13.00 – 14.00	-	tushlik
14.00 – 14.30	-	Madaniyatshunoslik va nomoddiy-madaniy meros ilmiy-tadqiqot instituti rahbari, san’atshunoslik fanlari bo‘yicha falsafa doktori I.Dadajonova va Madaniyat vazirligi Madaniy faoliyatni rivojlantirish boshqarmasi boshlig‘i J.Niyazbekovning “Nommodiy madaniy merosni asrashda zamonaviy yondashuvlar” mavzusida taqdimoti
14.30 – 15.00	-	Xalqaro va mahalliy ekspertlarni ma’ruzalari: Yu.Rajabiy nomidagi “O‘zbek milliy maqom instituti” rektori E.Shermanov ma’ruzasi – “O‘zbekistonda madaniy ta’lim sohasidagi islohotlar” ; O‘zbekiston davlat musiqali komediya (operreta) teatri direktori B.Gʻaniyev ma’ruzasi - “O‘zbekistonda teatr sohasidagi islohotlar” .
15.00 – 16.00	-	Qisqa tanaffus
15.00 – 16.00	-	Madaniyat vaziri O.Nazarbekov va xorijiy mehmonlar o‘rtasida uchrashuv (Madaniyat vazirligi)
16.00 – 17.00	-	O‘zbek milliy cholg‘ulari ko‘rgazmasi ochilish marosimida ishtirok etish (O‘zbek milliy akademik drama teatri)
17.00 – 18.00	-	Xorijiy mehmonlarni milliy OAV vakillariga intervyusi (O‘zbek milliy akademik drama teatri)
18.00 – 20.00	-	“Cho‘lpon” spektakli namoyishi (O‘zbek milliy akademik drama teatri)

 

 

 

Qo ‘shimcha ma’lumotlat uchun: +998 99 890 63 83, +998 91 588 90 85