Ўзбекистон Республикаси Ёшлар ишлари агентлиги

Имконият

8 397 ёш тил сертификатини олди

Бугунги кунда ёш авлоднинг чет тилларни билиши етакчи мутахасис бўлиши учун муҳим омил ҳисобланади. Шу боис Ёшлар ишлари агентлиги “Ибрат фарзандлари” лойиҳаси орқали мамлакатимизда ёшларнинг тилларни ўрганишига кўмаклашмоқда.

Ғиждувон туманида “Ибрат фарзандлари” лойиҳаси асосида “Ибрат сардорлари” лойиҳаси йўлга қўйилган. Лойиҳанинг мақсади туман миқёсида ёшларнинг тил ўрганиш имкониятини ошириш ва қизиқувчиларнинг тилни онлайн ўрганишини таъминлашга қаратилган “Ибрат Аcадемй” иловасини кенг тарғиб қилишдан иборат. Лойиҳага Шерзод Шарипов асос солган.

  – Ғиждувон туманидаги барча маҳаллада “Ибрат фарзандлари” лойиҳасининг маҳалладаги сардорлари тизимини жорий қилдик, – дейди “Ибрат сардорлари” лойиҳаси раҳбари Хуршид Тўхтаев. – Ҳар бир маҳалладан етакчилик қобилиятига эга, ўз атрофига ёшларни йиға оладиган, қобилиятли, хорижий тилга қизиқувчи, “Ибрат Аcадемй” дарсликларини тугатган, билимли ёшларни “Ибрат сардори” сифатида сайладик. Уларга керакли кўникмаларни бериб, тўғри йўналиш кўрсатдик. Сардорлар ўз маҳалласида атрофига 15-20 нафардан ўқувчини жамлаб, уларга дарсларни ўзлаштиришда кўмак беряпти. Ўқув жараёнлари “Ибрат Аcадемй” иловаси видеодарслари асосида олиб борилади.

“Ибрат сардорлари”да 34 400 фойдаланувчи рўйхатдан ўтган бўлиб, 33 570 нафар ўқувчи бепул тил ўрганмоқда. Шу кунгача 8 397 нафар ёш тил билиш даражасини аниқловчи сертификатларни қўлга киритган. Таъкидлаш ўринлики, 12-мактаб ўқувчилари, ака-ука Жасурбек ва Жўрабек Воҳидовларнинг лойиҳа доирасидаги ташббускорлиги ва етакчилиги таҳсинга лойиқ. Улар Фаcебоок саҳифасида ўз фаолиятини кенг ёритиши Ёшлар ишлари агентлиги мутасаддилари эътиборига тушиб, Президент совғаси сифатида мактабга 16 та планшет совға қилинди.

Ғиждувон тумани миқёсидаги “Хорижий тиллар ҳафталиги”, “Хорижий тиллар ойлиги”, “Хорижлик меҳмон билан бир кун” лойиҳалари, Маҳалла сардорлари форуми, “Ибрат фарзандлари” очиқ паралимпиадаси сингари қатор тадбирлар тил ўрганишга қизиқувчиларнинг янги кўникмалар олишига имкон яратмоқда.

Бугунги кунда “Ибрат сардорлари” 75 нафарни ташкил қилади. Улар орасида 10-синф ўқувчиси Шоҳруҳ Ҳамраев ҳам бор.

– Бир неча ой муқаддам ҳокимимиз таълим гранти асосида инглиз тилини ўргандим, – дейди инглиз тили билиш даражасидан “Б1” сертификатни қўлга киритган Шоҳруҳ Ҳамраев. – Ҳозир эса “Ибрат фарзандлари” доирасида маҳалламнинг “Ибрат сардори”ман. Туман ва маҳалламда инглиз тилини ўрганмоқчи бўлган ёшларни ўз атрофимга жамлаганман. Уларга Рустам Қориев дарслари асосида тил ўрганишларига кўмак бериб келмоқдаман. “Б1” сертификатини қўлга киритган бўлсам, тез орада бу натижаларимни янгилашга ҳаракат қиляпман. Албатта, бу кунга етиб келишимда устозларим ва ота-онамнинг ўрни катта. Устозларим менга хорижий тилларни ўзлаштиришим учун кўплаб маслаҳатлар беришди. Улардан миннатдорман. Келажакда немис тилини ҳам ўрганмоқчиман.

“Ибрат сардорлари” тарғибот ишларидан ташқари, ўз ютуқлари билан тенгдошларини руҳлантирмоқда. Шундай ёшлардан бири тумандаги “Биёсин” маҳалласининг “Ибрат сардори” Рухшона Намозова. Рухшона 9-синф ўқувчиси, хорижий тилга қизиқиши туфайли инглиз тилини мукаммал ўзлаштира олди. Ҳозирга қадар 10 га яқин миллий ва халқаро сертификатларни қўлга киритган. Рухшона бу ютуқлари билан оила аъзоларида ҳам инглиз тилига қизиқиш уйғотган ҳамда уларга тил ўрганишида кўмаклашмоқда. У ўқувчи бўлишига қарамасдан маҳалла марказида бир гуруҳ ўқувчиларга инглиз тилидан бепул дарс беради.

 – “Ибрат Аcадемй” иловаси чекка қишлоқлардаги ўқувчилар учун жуда қулай имконият деб ўйлайман, – дейди Рухшона Намозова. – Маҳалламиздаги ёшлар етакчиси ва ўқувчилар билан бирга ишлаб, 100 га яқин хорижий тилга қизиқувчиларни атрофимизга йиғдик. Уларга “Ибрат Аcадемй” иловасидан фойдаланишда ёрдам бермоқдамиз. Ўқувчилар орасида курсларни тугатиб, сертификатларини қўлга киритганлар ҳам бор. Имкониятлар оқилона фойланиб, топшириқлар ўз вақтида бажарилса, вилоят ёки туман марказига, вақт ва маблағ сарфлаб турли курсларга қатнашга ҳожат қолмайди.

“Ибрат Аcадемй” иловасидан фаол фойдаланувчилар рейтингида Бухоро ҳудудида Ғиждувон тумани биринчиликни эгаллаган. Туман рейтингида эса “Дегрезон” маҳалласи олдинда. Бу натижага эришишимизда ака-ука Воҳидовларнинг ҳиссаси катта.

“Ибрат сардорлари”нинг таклиф ва мулоҳазларини тинглаш, ҳамда уларга амалий ёрдам кўрсатиш мақсадида, Ғиждувон тумани ҳокими Шерзод Ашуров ҳар ҳафта “Ибрат сардорлари” билан суҳбат ўтказади. Суҳбатда “Ибрат сардорлари” инглиз тилида мулоқот ўрната олишади. Ғиждувон туманидаги бундай самарали лойиҳа Бухоро вилояти бўйлаб кенг тарқалмоқда.

Юсуфжон АСАДОВ,

Ғиждувон туманидаги “Дегрезон” маҳалласи ёшлар етакчиси,

“Ибрат сардорлари” лойиҳаси координатори