Июль ойида мамлакатимиздаги қуёш ва шамол электр станциялари томонидан 1 млрд 246 млн кВт⋅соат электр энергияси ишлаб чиқарилди — янги рекорд кўрсаткич
2025-08-04 12:00:00 / Янгиликлар
Ўзбекистондаги қуёш ва шамол электр станциялари томонидан 2025 йил июль ойида ишлаб чиқарилган электр энергияси миқдори бугунги кунгача рекорд натижани – 1 млрд 246 млн кВт⋅соатни ташкил қилди. Бу ой давомидаги жами генерациянинг 17 фоизи, деганидир.
Айтиш жоизки, бугунги кунда юртимизда умумий қуввати 4119 мегаватт бўлган 11 та қуёш фотоэлектр станцияси ва 4 та шамол электр станцияси «яшил» энергия ишлаб чиқармоқда.
Таъкидлаш керакки, июль ойида мазкур станциялар томонидан 1 млрд 246 млн кВт⋅соат электр энергияси ишлаб чиқарилгани мамлакатимиз энергетика тизими учун янги рекорд натижадир.
Эслатиб ўтамиз, бундан аввал жорий йил май ойида қуёш ва шамол электр станциялари орқали ишлаб чиқарилган электр энергияси ҳажми 1 млрд 104 млн кВт·соатни ташкил қилиб, ой давомидаги илк рекорд натижа қайд этилган эди (июль ойида ишлаб чиқарилган электр энергияси эса май ойидагидан 142 млн кВт·соат кўпни ташкил қилди).
Зеро, қайта тикланувчи энергия манбаларидан кенг фойдаланила бошланган 2022 йили иккита қуёш фотоэлектр станцияси томонидан йил давомида жами 434 млн кВт⋅соат, 2023 йилда эса жами 576,9 млн кВт⋅соат электр энергияси ишлаб чиқарилган эди.
Ўтган йили республикамиздаги қуёш ва шамол электр станциялари томонидан ишлаб чиқарилган жами электр энергияси ҳажми 4 млрд 860 млн кВт·соатни ташкил қилганди.
Айтиш жоизки, июль ойидаги мазкур генерациянинг 760,9 млн кВт⋅соатлик қисми қуёш электр станциялари томонидан, 485,4 млн кВт⋅соатлик қисми эса шамол электр станциялари томонидан ишлаб чиқарилди.
Бунинг натижасида:
➖ 377,5 млн куб метр табиий газ тежалишига эришилди;
➖ атмосферага 1 млн 120 минг тонна зарарли газларнинг чиқиши олди олинди.
Қолаверса, июль ойида Ўзбекистондаги барча қуёш, шамол ва гидроэлектр станциялари томонидан 2 млрд 89 млн кВт·соат электр энергияси ишлаб чиқарилди. Бу ой давомидаги жами генерациянинг 27 фоизини ташкил қилади.
Бунинг натижасида:
➖ 633 млн куб метр табиий газ тежалишига эришилди;
➖ атмосферага 1 млн 880 минг тонна зарарли газларнинг чиқиши олди олинди.
Маълумот учун: мазкур ҳажмдаги электр энергияси 1 миллион 492 минг хонадоннинг етти ойлик ёки 870 минг хонадоннинг бир йиллик меъёрий базасини ташкил қилади.
Эслатиб ўтамиз, 2025 йил 2 август куни йил бошидан бери қуёш ва шамол электр станциялари томонидан ишлаб чиқарилган жами электр энергияси миқдори 6 млрд кВт⋅соатдан ўтди.