Учқўрғон туманидаги умумий овқатланиш шохобчаси 1,6 млрд сўмлик табиий газдан, Сайхунобод туманидаги МЧЖ эса 1,6 млрд сўмлик электр энегиясидан ноқонуний фойдалангани аниқланди
2025-08-01 10:35:00 / Янгиликлар
Ёқилғи-энергия ресурсларидан ноқонуний фойдаланиш билан боғлиқ ҳолатларни фош этишга қаратилган назорат тадбирлари давом этмоқда.
Хусусан, Наманган вилоятининг Учқўрғон туманидаги «Р.К.Б» МЧЖ раҳбари Б.Р. жамиятга қарашли умумий овқатланиш шохобчасида табиий газ тармоғига тижорат мақсадида ўзбошимчалик билан уланиб, 1,6 млрд сўмлик (552 минг куб метр) табиий газни талон-торож қилгани аниқланди.
Мазкур ҳолат юзасидан жамият раҳбари B.R. га нисбатан Жиноят кодексининг 169-моддаси 4-қисми «а» банди билан жиноят иши қўзғатилиб, тергов ҳаракатлари олиб борилмоқда.
Шунингдек, «Ўзэнергоинспекция»нинг Сирдарё вилояти ҳудудий бошқармаси томонидан ўтказилган назорат тадбирида Сайхунобод туманида “Д. П. Т.” МЧЖ электр қурилмаларини ўзбошимчалик билан тармоққа улаб, электр энегиясидан ноқонуний фойдаланганлиги аниқланди.
Ушбу қоидабузарлик натижасида дастлабки ҳисоб-китобларга кўра, электр таъминоти корхонасига 1 млрд 609 млн сўмлик зарар етказилганлиги маълум бўлди.
Ҳозирда ҳуқуқни муҳофаза қилиш органлари томонидан терговга қадар текширув ишлари олиб борилмоқда.