Тошкентнинг электр таъминоти ва экологик барқарорлиги учун муҳим қадам: 500 кВли “Ҳалқа” подстанциясига кучланиш берилди
2026-11-07 18:50:00 / Янгиликлар
Бугун, 7-ноябр куни юртимиз энергетика тизимидаги йирик инфратузилмавий лойиҳалардан бири — янги 500 кВли “Ҳалқа” подстанциясига кучланиш берилди.
Ўзбекистондаги энг йирик ва замонавий юқори кучланишли обектлардан бири бўлган мазкур подстансия 1602 МВА қувватга эга. Унинг ишга туширилиши Тошкент шаҳри ва Тошкент вилоятининг бир қисмида электр энергияси таъминотини янада мустаҳкамлаш, шунингдек, мавжуд электр тармоқларига тушаётган юкламани мақбул тақсимлаш имконини беради.
Энг муҳими, янги подстансиянинг ишга туширилиши натижасида Тошкент шаҳри ва Тошкент вилоятининг бир қисмидаги электр юкламалари қайта тақсимланади. Натижада Тошкент иссиқлик электр стансиясига тушадиган юклама камайиб, стансияда мазут ёқилғисидан фойдаланишга эҳтиёж қолмайди.
Демак, “Ҳалқа” подстанциясининг аҳамияти фақат электр таъминоти ишончлилигини ошириш билан чекланмайди. У пойтахт ва унга туташ ҳудудларда экологик вазиятни яхшилаш, атмосферага чиқариладиган ифлослантирувчи моддаларни камайтиришга қаратилган чора-тадбирларни амалга оширишда ҳам муҳим ўрин тутади.
Умумий қиймати 171,4 млн АҚШ долларини ташкил этган мазкур инвестиция лойиҳаси Жаҳон банки иштирокида амалга оширилди. Лойиҳа доирасида 1602 МВА қувватли “Ҳалқа” подстанцияси билан бирга 220 кВли 213 километр ва 500 кВли 72 километр, жами 285 километр юқори кучланишли электр узатиш тармоқлари барпо этилди.
Ушбу инфратузилма мамлакат ягона энергетика тизимининг узатиш имкониятларини кенгайтириш, электр энергияси оқимларини самарали тақсимлаш ва ортиб бораётган истеъмол талабини ишончли қондириш учун мустаҳкам асос бўлиб хизмат қилади.
Айни пайтда янги обектларни ягона энергетика тизимига тўлиқ интеграция қилиш бўйича якуний ишлар давом этмоқда.