Ўзбекистон Республикаси Энергетика вазирлиги

Кеча, 18 сентябрь куни Энергетика вазирлиги ҳамда “Ўзэлтехсаноат” уюшмаси ҳамкорлигида “Энергетика йўналишидаги йирик лойиҳаларда электротехника саноати корхоналари билан кооперация алоқаларини мустаҳкамлаш” мавзусида лойиҳа ташаббускорлари ҳамда энергетика тизими корхоналари ўртасида Кўргазмали учрашув ташкил этилди.

Давлатимиз раҳбари раислигида жорий йил 5 сентябрь куни “Электротехника соҳасида ишлаб чиқариш, экспорт ва инвестиция оқимини янада кўпайтириш чора-тадбирлари юзасидан” ўтказилган видеоселектор йиғилишида энергетика, қурилиш, сув хўжалиги, автомобилсозлик йўналишларида электротехника маҳсулотларига бўлган талаб кун сайин ошиб бораётганлиги сабабли вазирлик ва идора раҳбарлари олдига маҳаллий корхоналар билан кооперация алоқаларини кенгайтириш бўйича вазифалар белгилаб берилган эди.

Ушбу топшириқлар ижросидан келиб чиқиб, Энергетика вазирлиги ҳамда “Ўзэлтехсаноат” уюшмаси ҳамкорлигида ташкил этилган мазкур кўргазмали давра суҳбатида кабель-сим, қуёш панеллари, кучланиш қурилмалари ва бошқа қурилиш учун зарур электротехника маҳсулотлари ишлаб чиқарувчи 20 дан ортиқ йирик тадбиркорлик субъектлари ўз маҳсулотлари билан иштирок этишди.

Учрашувда республика бўйлаб энергетика тармоқлари йўналишида амалга оширилаётган йирик лойиҳалар доирасида кооперация алоқаларини кенгайтириш бўйича олиб борилаётган ишлар таҳлил қилинар экан, бу йўналишдаги хусусий шерикчилик лойиҳаларида маҳаллий товарлар улушини 25 фоизга, кабель-ўтказгичларда эса 70 фоизга етказиш бўйича келишувга эришилган.

Жумладан, “Masdar”, “ACWA Power” ва “China Gezhouba Group” билан 2023-2024 йилларда қиймати 30 миллион долларлик шарномалар тузилиб, бугунги кунга қадар 26,4 миллион долларлик маҳсулотлар етказиб берилган. Бу эса, келгуси йилларда 100 миллион долларлик импортни оптималлаштиришга эришилишини кўрсатмоқда. Аммо бу билан ишлар тўхтаб қолмаслиги, ишга солинмаган захира ва имкониятлардан етарли даражада фойдаланилмаётганлиги, ҳали тизимда қатор муаммолар мавжудлиги таъкидлаб ўтилди.

Бугунги кунда энергетика, қурилиш, сув хўжалиги, автомобилсозликда электротехника маҳсулотларига талаб кун сайин ошиб бормоқда. Масалан, энергетика соҳасида 36 миллиард долларлик 27 гигаватт электр энергияси ишлаб чиқариш лойиҳалари амалга ошириляпти. Шунга асосланиб, давлат инвестиция дастурлари ва йирик лойиҳалар бўйича “маҳаллий контент”ни кўпайтириш бўйича амалга ошириладиган ишлар таҳлил қилинди. Йирик лойиҳаларнинг қурилиши учун зарур бўлган кабель-сим маҳсулотлари, қучланиш қурилмалари, қуёш панелларини маҳаллий корхоналар билан шартнома тузган ҳолда етказиб бериш масалалари кўриб чиқилди. Лойиҳа ташаббускорларининг талаб ва истаклари тингланди.

Шунингдек, учрашувда тармоқлараро кооперация алоқаларини кенгайтириш орқали маҳаллий корхоналарни қўллаб-қувватлаш ва бу орқали импорт маҳсулотларини қисқартириишга эришилиш таъкидлаб ўтилди. 

Кўргазмада 400 га яқин маҳаллий маҳсулотларнинг аналог импорт маҳсулотларидан афзаллиги, таннархи ҳамда халқаро стандартларга жавоб бериши каби имкониятлари тушунтирилди.
 

Энергетика вазирлиги ва
“Ўзэлтехсаноат” уюшмаси Ахборот хизмати.