Ўзбекистон Республикаси Энергетика вазирлиги

Президентимизнинг 2026 йил 19 августда “Мамлакатда кичик ва микро гидроэлектр станциялари тармоғини ривожлантиришнинг навбатдаги чора-тадбирлари тўғрисида”ги 298-сон қарори қабул қилинди.

Қарорга кўра, 2027 йил 1 февралгача салоҳиятли кичик ва микро ГЭС лойиҳаларини аниқлаш, амалга ошириш ва эксплуатация қилиш жараёнларини мувофиқлаштириш ҳамда мониторинг қилиш мақсадида рақамли платформа ишлаб чиқилади.

Хусусий сектор иштирокида кичик ва микро ГЭСлар лойиҳаларини амалга ошириш тартиби тўғрисидаги низом (ягона тартиб) ҳамда лойиҳалаштириш, қуриш, ишга тушириш ва эксплуатация қилиш бўйича услубий қўлланма ишлаб чиқилади. Бунда атроф-муҳитга оид ва ижтимоий талаблар мажбурий тартибда инобатга олиниши белгиланади.

Қуввати 5 МВтгача кичик ва микро ГЭСларни қуриш бўйича лойиҳа ташаббускорларини аниқлаш мақсадида вазирлик буюртмаси асосида «Э-аукцион» электрон савдо майдончасида ишлаб чиқарилган электр энергиясини сотиб олишда ўтказиладиган электрон аукционда бошланғич нарх билан биргаликда энг қуйи нархни ҳам белгилаш тартиби жорий этилади.

Бунда нархлар II гуруҳ истеъмолчилари учун белгиланган тарифга нисбатан қуйидагича ўрнатилади:

• қуввати 500 кВтгача бўлган микро ГЭСларга – бошланғич нархи 150 фоиз, энг қуйи нархи 50 фоиз миқдорида;

• қуввати 500 кВтдан 2 МВтгача бўлган кичик ГЭСларга – бошланғич нархи 120 фоиз, энг қуйи нархи 40 фоиз миқдорида;

• қуввати 2 МВтдан 5 МВтгача бўлган кичик ГЭСларга – бошланғич нархи 100 фоиз, энг қуйи нархи 30 фоиз миқдорида.

Қуввати 100 кВтгача бўлган микро ГЭСлар лойиҳаларини амалга ошириш (лойиҳалаш ва қуриш)да соддалаштирилган тартиб йўлга қўйилади. Хусусан:

• қуввати 100 кВтгача бўлган микро ГЭСларни қурилиш объектларининг хавф-хатар тоифаси бўйича ИИ мураккаблик тоифасига киритилади;

• қуввати 50 кВтгача бўлган, иншоот ҳажми 300 метр кубдан ошмайдиган микро ГЭСларни шаҳарсозлик ҳужжатлари экспертизасидан ҳамда давлат архитектура-қурилиш назоратидан ўтказишдан озод этилади;

• бунда лойиҳа ташаббускорларига қурилиш ишларини қурилиш лойиҳасининг электр қисми асосида босқичма-босқич амалга оширишга рухсат берилади.

2026/2027-ўқув йилидан бошлаб кичик қувватли яшил энергия йўналишлари, жумладан, кичик гидроэнергетика учун юқори малакали кадрларни тайёрлашни олий таълим ташкилотларида дуал таълим тизими асосида жорий этилади.