Республикамизда биринчи марта тақсимлаш электр тармоқларини хусусий сектор бошқарувига инвестиция киритиш шарти билан бериш амалиёти жорий этилмоқда
2026-08-15 15:35:00 / Янгиликлар
Самарқанд вилоятида ўтказилган халқаро тендер натижаларига кўра, Туркиянинг “Aksa Elektrik” компанияси ғолиб деб топилди.
Компания томонидан Самарқанд вилоятида мавжуд электр тармоқларини эксплуатация қилиш, шунингдек, янги тармоқларни қуриш бўйича лойиҳа амалга оширилади.
Ушбу лойиҳани амалга ошириш жараёнида “Aksa Elektrik” компанияси Туркия ва бошқа хорижий мамлакатларда эришган ютуқлари ҳамда тўплаган тажрибасини Ўзбекистонга олиб киради.
Самарқанд ҳудудий электр тармоқларининг барча ишчи-ходимлари янги компанияга ишга қабул қилинади.
Компания вакилларининг ҳисоб-китобларига кўра, чет элдан атиги 10–15 нафар мутахассис жалб этилади. Қолган ишлар маҳаллий мутахассислар томонидан амалга оширилади. Бунинг учун ходимларга зарур тренинглар ўтказилади, уларнинг малакаси оширилади ҳамда янги жорий этилаётган технологиялар билан таништирилади.
Албатта, бу бизнес модели республикада биринчи марта қўлланилмоқда. Шунинг учун унинг дастлабки натижалари ва тажрибасидан келиб чиққан ҳолда, келгусида бошқа ҳудудларда ҳам ушбу тизимни жорий этиш бўйича ишлар амалга оширилиши керак. Бу борада ҳурматли Президентимиз томонидан ҳам тегишли топшириқлар берилган.
Компаниянинг Ўзбекистондаги фаолияти доирасида электр тармоқларини қуриш, модернизация ва реконструкция қилиш ишларида фойдаланиладиган маҳсулотларнинг камида 90 фоизини ички бозордан, яъни маҳаллий ишлаб чиқарувчилардан харид қилиш кўзда тутилган.
Лойиҳа доирасида киритилиши лозим бўлган инвестициялар ҳажми ҳам аниқ белгилаб қўйилган. Яъни компания белгиланган миқдордан кам бўлмаган ҳажмда инвестиция киритиши шарт. Бу, албатта, Самарқанд вилоятининг ижтимоий-иқтисодий ривожланишига катта ҳисса қўшади. Айниқса, ҳудуднинг туристик салоҳияти ва саноатини ривожлантиришга қўшимча туртки беради, деб ўйлайман.
Компания мутахассислари ҳозирданоқ ҳудудни ўрганиш ишларини олиб бориб, илмий ёндашув асосида лойиҳаларни шакллантирмоқда. Хусусан, дастлабки икки йил давомида Самарқанд вилоятида биринчи навбатда амалга оширилиши лозим бўлган 400 та микролойиҳа танлаб олинди.
Бу ерда «микролойиҳа» деганда, ўртача ҳисобда битта маҳалла доирасида амалга ошириладиган ишлар назарда тутилмоқда. Яъни лойиҳалар ҳам «маҳаллабай» тамойили асосида шакллантирилмоқда.