Ўзбекистон Республикаси Энергетика вазирлиги

Тошкент вилоятининг Янгийўл туманида аҳоли ва тадбиркорларни электр энергияси билан барқарор таъминлаш, мавжуд муаммоларни манзилли аниқлаш ва бартараф этиш, электр тармоқлари инфратузилмасини яхшилаш ҳамда энергия йўқотишларини камайтириш бўйича амалий ишлар олиб борилмоқда.

Тумандаги 51 та маҳалланинг барчасида аҳоли ва тадбиркорларнинг электр энергиясига бўлган ойлик, чораклик ва йиллик эҳтиёжи ўрганилиб, ҳар бир маҳалланинг энергия истеъмоли баланси шакллантирилди.

Ўрганишлар натижасида туманда қўшимча 1,4 МВт электр қувватига эҳтиёж борлиги, 102 та трансформатор пунктини модернизация қилиш, 459 км электр тармоқларини реконструкция қилиш ва 30,5 км янги тармоқ тортиш зарурлиги аниқланди. Шунингдек, АСКУЭ тизимига мос келмайдиган 285 та ҳисоблагич ҳамда оғир техник ҳолатдаги 51 та трансформатор мавжудлиги белгилаб олинди.

Бугунги кунга қадар 2 161 та хонадон, 19 та тадбиркорлик субъекти ва 4 та ижтимоий соҳа объектининг электр таъминоти ҳолати ўрганилиб, аниқланган муаммоларнинг асосий қисми бартараф этилди.

Шунингдек, 94 та трансформатор пункти ва 31 та таянч устуни таъмирланди, 7 та янги трансформатор пункти ҳамда 170 та янги устун ўрнатилди. 105,4 км электр тармоғи дарахт шох-шаббаларидан тозаланди. Бу ишлар тармоқларнинг ишончлилигини ошириш ва авариявий узилишларнинг олдини олишга қаратилган.

АСКУЭ тизимига мос келмайдиган ҳисоблагичларни янгилаш ишлари доирасида 32 та ҳисоблагич замонавий ускуналарга алмаштирилди. Шунингдек, маълумот узатмаётган 24 та қурилманинг ишлаши тикланди.

Ўрганишлар давомида аниқланган электр таъминоти билан боғлиқ камчиликлар бўйича масъул ташкилотлар ва мутасаддиларга аниқ вазифалар белгиланмоқда. Айниқса, аҳоли хонадонлари, тадбиркорлик субъектлари ва ижтимоий соҳа объектларининг электр таъминотига алоҳида эътибор қаратилмоқда.

Амалга оширилган ишлар натижасида электр энергияси бўйича 3,7 млрд сўм қарздорлик ундирилди. Шунингдек, 1 млрд 885 млн сўм миқдоридаги нореал қарздорлик қисқартирилди.

Электр энергиясидан ноқонуний фойдаланиш ҳолатларини аниқлаш бўйича ҳам назорат тадбирлари кучайтирилди. Тадбирлар давомида 30 та ташкилотда электр энергиясидан ноқонуний фойдаланиш ҳолатлари бўйича далолатномалар расмийлаштирилди.