Электр энергияси бўйича икки рекорд: истеъмол ҳам, ишлаб чиқариш ҳам энг юқори кўрсаткичга чиқди
2026-07-16 12:00:00 / Янгиликлар
Ўзбекистон ягона энергетика тизимида ёзги мавсум учун суткалик электр энергияси истеъмоли 288,1 млн кВт·соатга етиб, янги рекорд қайд этилди. Мазкур кўрсаткич 14 июль куни қайд этилган ёзги максимум — 284 млн кВт·соатдан 4,1 млн кВт·соатга ёки 1,44 фоизга юқори бўлди.
Маълумот учун, 2026 йил 15 июль куни суткалик электр энергияси ишлаб чиқариш ҳажми ҳам 291,4 млн кВт·соатни ташкил этиб, янги рекорд ўрнатди. Бу 14 июль куни қайд этилган 287,3 млн кВт·соатлик максимумдан 4,1 млн кВт·соатга ёки 1,43 фоизга кўпдир.
Юқори истеъмол даврида электр таъминоти барқарорлигини таъминлаш мақсадида энергетика корхоналарининг авария-таъмирлаш бригадалари кучайтирилган тартибда ишлаб, электр тармоқларидаги носозлик ва авариявий ҳолатларни тезкор бартараф этишмоқда.
Хусусан, кеча айрим ҳудудларда, жумладан, Тошкент шаҳрининг Учтепа, Чилонзор, Шайхонтоҳур, Мирзо Улуғбек, Яшнобод ва Сергели туманларидаги айрим электр тармоқларида юзага келган носозликлар энергетиклар томонидан тезкор бартараф этилди. Шунингдек, соат 10:56 да Фарғона вилоятидаги «Л-Арсиф-1» электр узатиш тармоғида носозлик бўлган. Бунинг оқибатида Қува туманидаги айрим истеъмолчилар электр таъминотидан вақтинча узилган ва ушбу носозлик соат 11:35 да бартараф этилиб, истеъмолчиларнинг электр таъминоти қайта тикланган.
16 июль куни соат 00:12 да Тошкент шаҳридаги подстанцияда носозлик кузатилган. Бунинг оқибатида Чилонзор ва Яккасарой туманларининг айрим ҳудудларида электр таъминотида вақтинча узилаш кузатилмоқда. Энергетиклар ушбу носозликни бартараф этиш ишларини олиб боришмоқда.
Электр станциялар, подстанциялар, трансформатор пунктлари, электр узатиш тармоқлари ҳамда қурилмаларини янгилаш, уларнинг қувватларини ошириш каби қатор ишлар бажарилмоқда. Бу эса, истеъмолчиларни мавсумда электр энергияси билан таъминлаш ишончлилигини оширишга хизмат қилади.
Юқори истеъмол вақтларида айрим ҳудудларда электр тармоқларида юзага келиши мумкин бўлган техник носозликлар сабабли электр таъминотида вақтинчалик узилишлар кузатилиши мумкин. Энергетиклар электр таъминотини барқарор сақлаш учун узлуксиз меҳнат қилишда давом этади.
Юртдошларимиздан эса илтимос — ўзингиз ва яқинларингизни эҳтиёт қилинг, иссиқ кунларда саломатликка эътиборли бўлинг ҳамда электр энергиясидан тежамкорлик билан фойдаланинг. Бу билан биргаликда электр таъминоти барқарорлигини таъминлашга ҳисса қўшамиз.