Ўзбекистон Республикаси Энергетика вазирлиги

Қонун билан:

- коррупцияга оид жиноятларнинг аниқ рўйхати белгиланди;
- коррупция учун жавобгарлик ва жазо чоралари кучайтирилмоқда;
- коррупция ҳақида хабар берган шахсларнинг ҳимояси таъминланмоқда;
- Коррупцияга қарши курашиш бўйича миллий ва ҳудудий кенгашлар, Коррупцияга қарши курашиш агентлиги ҳамда комплаенс ва ички назорат тузилмалари ваколатлари асосий қонунда акс этди;
- давлат харидларида коррупциявий омилларни қисқартириш чоралари кучайтирилди;
- коррупцияга нисбатан муросасиз муносабатни шакллантириш ёшларга оид давлат сиёсатининг устувор йўналишларидан бири сифатида белгиланди.

Жумладан:

▫️Жиноят кодексида:
- “коррупцияга оид жиноятлар” тушунчасига таъриф берилиб, унга 18 турдаги жиноят киритилди;
- коррупциявий жиноятлар учун жазо чоралари кучайтирилди;
- ўзлаштириш ёки растрата йўли билан талон-торож қилиш, фирибгарлик учун такроран ҳукм қилинган ва етказилган зарарнинг ўрнини тўлиқ қопламаган, шунингдек, такроран ёки хавфли рецидивист бўла туриб ёхуд жуда кўп миқдорда пора олиш, пора бериш, пора олиш-беришда воситачилик қилиш жиноятларини содир этган шахсларга нисбатан жазодан муддатидан илгари шартли озод қилиш ёки жазони енгилроғи билан алмаштириш қоидалари қўлланилмаслиги белгиланди.

▫️Маъмурий жавобгарлик тўғрисидаги кодексда:
​- давлат харидларида харид предметининг бошланғич нархини шакллантириш тартибини бузиш, шунингдек, бошланғич нарх ҳамда ўртача бозор нархи ўртасида йўл қўйиладиган тафовутнинг энг кўп миқдорини бузганлик учун маъмурий жавобгарлик белгиланди.

“Коррупцияга қарши курашиш тўғрисида”ги Қонунда:

- Коррупцияга қарши курашиш бўйича миллий кенгаш таркиби Ўзбекистон Республикаси Президенти томонидан тасдиқланиши ва Кенгашнинг раҳбар органлари қонун даражасида белгиланди;
- коррупцияга қарши курашиш бўйича ҳудудий кенгашларнинг мақоми ва вазифалари алоҳида моддада аниқ акс эттирилди;
- Коррупцияга қарши курашиш агентлигига қўшимча тарзда жамиятда коррупцияга нисбатан муросасиз муносабатни шакллантириш бўйича 8 та янги вазифа юклатилди.

Қонунда комплаенс ва коррупцияга қарши ички назорат тузилмаларининг вазифалари ва ҳуқуқлари, шунингдек, хавфсизлик кафолатлари мустаҳкамланди.

Унга кўра, комплаенс ва коррупцияга қарши ички назорат тузилмалари ходимлари давлат ҳимоясида бўлади, уларга нисбатан тергов ва процессуал ҳаракатлар Бош прокурорнинг рухсати билан ёки уни хабардор этган ҳолда амалга оширилади.

Қонунга мувофиқ, коррупцияга оид жиноятларни содир этган шахсларнинг электрон реестри юритилади.

Электрон реэстрга киритилган шахсларга давлат хизматига кириш, сайланадиган тайинланадиган лавозимларга номзодини кўрсатиш, давлат харидлари ва ДХШ битимларида иштирокчи сифатида қатнашиш тақиқланади.

Ўз меҳнат фаолиятини олиб бораётган ташкилотда коррупцияга оид жиноят тўғрисида хабар берган шахсларга нисбатан Агентликни хабардор қилмасдан 2 йил давомида интизомий жазо қўллаш мумкин эмас.