Ўзбекистон Республикаси Энергетика вазирлиги

Ассалому алайкум.

Жорий йилнинг январь–май ойларида ёқилғи-энергетика соҳасига доир жисмоний ва юридик шахслардан келиб тушган мурожаатларни кўриб чиқиш натижалари ҳақида маълумот берамиз.

Маълумки, Президентимизнинг 2026 йил 13 март куни ўтказилган видеоселектор йиғилишида Халқ мурожаатлари билан ишлаш тизимини янги босқичга олиб чиқиш, аҳоли фикрини чуқур таҳлил қилиш ва муаммоларга тезкор ечим топиш бўйича муҳим вазифалар белгилаб берилган эди.

Бугунги кунда аҳоли мурожаатларини ўз вақтида кўриб чиқиш, фуқароларни қийнаётган масалаларга тезкор ва самарали ечим топиш соҳанинг устувор вазифаларидан бири ҳисобланади. Шу мақсадда, келиб тушиш манбаидан қатъи назар, барча мурожаатлар Ўзбекистон Республикаси Президентининг Виртуал қабулхонаси орқали рўйхатга олиниб, мунтазам таҳлил қилинмоқда ҳамда кўтарилган масалалар юзасидан тегишли чоралар кўрилмоқда.

2026 йилнинг дастлабки беш ойи давомида ёқилғи-энергетика соҳасига доир жами 49 240 та мурожаат келиб тушган. Шундан 29 844 таси ёки 60 фоизи Ўзбекистон Республикаси Президентининг Виртуал қабулхонаси орқали қабул қилинган.

Мурожаатларнинг асосий қисми суюлтирилган газ баллонларини тўлдиришдаги муаммолар, табиий газ истеъмоли учун ҳисоб-китоблар, электр таъминотидаги узилишлар, электр тармоқларини янгилаш ҳамда электр энергияси учун ҳисоб-китоблар билан боғлиқ масалалар ҳиссасига тўғри келади.

Табиий ва суюлтирилган газ таъминоти бўйича жами 24 908 та мурожаат келиб тушган бўлиб, бу умумий мурожаатларнинг 50,5 фоизини ташкил этади. Ушбу кўрсаткич ўтган йилнинг мос даврига нисбатан 4 817 тага ёки 24 фоизга ошган.

Энг кўп мурожаатлар газ баллонларини тўлдириш масаласига тўғри келиб, бу йўналишда 11 050 та мурожаат қайд этилган. Бу ўтган йилнинг мос даврига нисбатан қарийб 21 фоизга кўпдир. Шу билан бирга, янги маиший газ баллонлари билан таъминлаш ва газ учун тўловларга оид мурожаатлар сони сезиларли даражада камайган.

Электр таъминоти бўйича эса жами 16 635 та мурожаат қайд этилган бўлиб, бу умумий мурожаатларнинг 34 фоизини ташкил этади. Мазкур йўналишдаги мурожаатлар сони ўтган йилга нисбатан камайган.

Айниқса, электр объектларини қуриш ва таъмирлаш, электр ҳисоблагичлари билан боғлиқ носозликлар, истеъмолчиларнинг тўловлари ва қарздорлиги, шунингдек, электр таъминоти ходимлари фаолиятига оид мурожаатлар сонининг қисқаргани кузатилмоқда. Бу эса тизимда амалга оширилаётган модернизация ишлари ва аҳолига хизмат кўрсатиш сифатини оширишга қаратилган чора-тадбирлар самара бераётганидан далолатдир.

Вазирлар Маҳкамасининг 2026 йил 15 майдаги “Ёқилғи-энергетика ресурслари нархларини белгилаш тўғрисида”ги 243-сон қарори билан боғлиқ тариф ва нарх масалалари юзасидан 381 та мурожаат келиб тушган бўлиб, бу ўтган йилга нисбатан қарийб 48 фоизга камдир. Бу ҳолат мазкур йўналишда олиб борилган ҳуқуқий тушунтириш ишлари ҳамда истеъмолчилар билан мулоқот самарадорлиги ортиб бораётганини кўрсатади.

Шунингдек, соҳага доир бошқа масалалар бўйича 7 316 та мурожаат қайд этилган.

Келиб тушган мурожаатларни кўриб чиқиш натижаларига тўхталадиган бўлсак, жами мурожаатларнинг 44 593 таси ёки 91 фоизи ижобий ҳал этилган. Бу мурожаатларда кўтарилган масалалар бўйича амалий чоралар кўрилган ва бу фуқаролар муаммоларига ечим топилганини англатади.

Хусусан, табиий ва суюлтирилган газ таъминоти бўйича 18 659 та ёки 75 фоиз мурожаат ўз ечимини топган. Жумладан, газ баллонларини етказиб бериш ва тақсимлаш билан боғлиқ 9 366 та, табиий газ ҳисоблагичлари бўйича 3 470 та ҳамда газ босими ва таъминоти билан боғлиқ 2 576 та мурожаат ижобий ҳал этилган.

Электр таъминоти бўйича эса 8 991 та мурожаат, яъни мазкур тоифадаги мурожаатларнинг 54 фоизи ижобий ҳал қилинган. Хусусан, электр таъминотидаги узилишлар бўйича 4 209 та, электр тармоқларини қуриш ва таъмирлаш масалалари бўйича эса 2 199 та мурожаат ижобий ҳал этилган.

Ҳудудлар кесимида таҳлиллар шуни кўрсатадики, энг кўп мурожаатлар аҳоли сони ва истеъмолчилар улуши юқори бўлган ҳудудларга тўғри келмоқда.

Жумладан, Қашқадарё вилоятидан 6 314 та, Самарқанд вилоятидан 5 272 та, Андижон вилоятидан 5 269 та, Тошкент вилоятидан 4 862 та, Сурхондарё вилоятидан 4 600 та ҳамда Тошкент шаҳридан 4 468 та мурожаат келиб тушган.

Ижобий ҳал этилган мурожаатлар сони бўйича Андижон вилояти 4 042 та, Қашқадарё вилояти 3 364 та, Самарқанд вилояти 3 129 та ва Тошкент вилояти 3 038 та кўрсаткич билан юқори натижаларни қайд этган.

Аҳоли томонидан билдирилаётган таклиф ва муаммолар асосида тизимдаги камчиликлар аниқланиб, уларни бартараф этиш бўйича манзилли чора-тадбирлар амалга оширилмоқда.

Шу ўринда истеъмолчиларга эслатиб ўтамиз: мурожаатларни кўриб чиқиш жараёнида йўл қўйилган қонун бузилиши ҳолатлари юзасидан вазирликнинг (71) 231-10-64 алоқа канали, (71) 231-81-18 ишонч телефони ҳамда ижтимоий тармоқлардаги расмий саҳифалар орқали мурожаат қилиш мумкин.

Эътиборингиз учун раҳмат.