Брифинг: 2026 йил январь-март ойларида ишлаб чиқарилган электр энергияси ўтган йилнинг мос даврига нисбатан 7%га кўп
2026-04-04 10:50:00 / Янгиликлар
Энергетика вазирлигининг Жамоатчилик билан алоқалар бўлими бошлиғи Дилдора Хашимова 2026 йилнинг январь-март ойларида электр энергиясини ишлаб чиқариш ва етказиб бериш ҳамда мурожаатлар билан ишлаш натижалари ҳақида маълумот берди.
Ассалому алайкум, бугунги кунда республика бўйлаб энергетика тизимининг барқарор ишлашини таъминлаш ҳамда аҳоли ва иқтисодиёт тармоқларини электр энергияси билан узлуксиз таъминлаш бўйича ишлар тизимли олиб борилмоқда.
Жумладан, 2026 йилнинг январь–март ойларида республикада электр энергияси ишлаб чиқариш ҳажми ўтган йилнинг мос даврига нисбатан сезиларли даражада ошди.
Жорий йилнинг дастлабки уч ойида республика бўйича жами 23 миллиард 317 миллион киловатт⋅соат электр энергияси ишлаб чиқарилди. Бу ўтган йилнинг шу даврига нисбатан 1 миллиард 471 миллион киловатт⋅соатга, яъни 7 фоизга кўп демакдир.
Шу билан бирга, мазкур даврда истеъмолчиларга 20 миллиард 163 миллион киловатт⋅соат электр энергияси етказиб берилди. Бу кўрсаткич 2025 йилнинг мос даврига нисбатан 262 миллион киловатт⋅соатга, ёки 1 фоизга ошганини кўрсатади.
Энергетика соҳасида амалга оширилаётган модернизация ишлари ва янги генерация қувватларини ишга тушириш электр таъминоти барқарорлигини оширишга хизмат қилаётганини кўрсатади. Энергетика вазирлиги аҳоли ва иқтисодиёт тармоқларини ишончли электр энергияси билан таъминлаш бўйича ишларни давом эттиради.
Мурожаатлар билан ишлаш бўйича вазирлик штаби тузилиб, тизимли ишлар йўлга қўйилди.
Штаб томонидан 2025 йил 1 январдан 2026 йил 16 мартгача келиб тушган жами 33 191 та яқин мурожаатни қайта ўрганиш учун вилоят, туманлар/шаҳарлар кесимида тақсимланиб, ишчи гуруҳлар томонидан улардан 23261 тасида қайта ўрганилди. Бунинг натижасида яна 7012 та мурожаат ижобий ҳал этилиб, жами ижобий ҳал этилган мурожаатлар сони 16 197 та (48,8 %)га етказилди.
Бундан ташқари, аҳолига янада қулайлик яратиш ва очиқликни таъминлаш мақсадида ОАВ ва ижтимоий тармоқлар орқали кенг кўламли тарғибот ишлари олиб борилмоқда. Хусусан, сайёр қабуллар, Call-марказлар ҳамда диспетчерлик хизматлари фаолиятини янада яхшилашга қаратилган қатор амалий тадбирлар ўтказилиб, жамоатчиликка тушунтиришлар берилмоқда.