Ўзбекистон Республикаси Энергетика вазирлиги

Кеча, 20 март куни Ўзбекистондаги қуёш ва шамол электр станциялари томонидан 2026 йил бошидан бери ишлаб чиқарилган электр энергияси ҳажми 2 млрд кВт⋅соатга етди.

Аввал хабар берганимиздек, бугунги кунда юртимизда умумий қуввати 5 582 мегаватт бўлган 15 та қуёш фотоэлектр станцияси ҳамда 5 та шамол электр станцияси «яшил» энергия ишлаб чиқармоқда.

Маълумки, мамлакатимизда қайта тикланувчи энергия манбаларидан кенг фойдаланила бошланган 2022 йили Навоий ва Самарқанд вилоятларидаги қуёш фотоэлектр станциялари томонидан 434 млн кВт⋅соат, 2023 йилда эса 576,9 млн кВт⋅соат электр энергияси ишлаб чиқарилган эди.

2024 йили 9 та қуёш ва 1 та шамол электр станцияси томонидан ишлаб чиқарилган жами электр энергияси ҳажми 4 млрд 860 млн кВт·соатни ташкил қилган бўлса, 2025 йилда барча қуёш ва шамол электр станциялари томонидан ишлаб чиқарилган электр энергияси ҳажми 10,5 млрд кВт⋅соатга етди.

Айтиш жоизки, 2026 йил бошидан кеча, 20 март куни ҳолатига қуёш фотоэлектр станциялари томонидан 959,2 млн кВт⋅соат, шамол электр станциялари томонидан эса 1 млрд 56,2 млн кВт⋅соат, жами 2 млрд 15,4 млн кВт⋅соат электр энергияси ишлаб чиқарилди.

Эслатиб ўтамиз, 13 февраль куни қуёш ва шамол электр станциялари томонидан 2026 йил бошидан бери ишлаб чиқарилган электр энергияси ҳажми 1 млрд кВт⋅соатни ташкил қилган эди.

Маълумот учун: 2026 йилнинг бошидан қуёш ва шамол электр станциялари томонидан ишлаб чиқарилган электр энергияси ҳажми 2025 йилнинг мос давридагига нисбатан 610,7 млн кВт·соат ёки 43 фоизга кўп электр энергиясиишлаб чиқарилди.

Бунинг натижасида:

➖537 млн куб метр табиий газ тежалишига эришилди;

➖ атмосферага 1 млн 158 минг тоннадан ортиқ зарарли моддалар чиқишининг олди олинди.

Қолаверса, жорий йил бошидан кеча, 20 март куни ҳолатига Ўзбекистондаги барча гидроэлектр станциялар ва қуёш ҳамда шамол электр станциялари томонидан 3 млрд 160 млн кВт·соат электр энергияси ишлаб чиқарилди.

Бунинг натижасида:

➖ 839 млн куб метр табиий газ тежалишига эришилди;

➖ атмосферага 1 млн 808 минг тоннадан ортиқ зарарли моддалар чиқишининг олди олинди.

Маълумот учун: мазкур ҳажмдаги электр энергияси ўртача 5,2 млн хонадоннинг 3 ойлик ёки 1,3 млн хонадоннинг бир йиллик меъёрий базасини ташкил қилади.