2026 йилда ИЭС ва ИЭМлар томонидан 10,8 млрд кВт·соат электр энергияси ишлаб чиқарилди — бу ўтган йилнинг мос давридагидан 7 фоизга кўп
2026-02-18 12:00:00 / Янгиликлар
2026 йил 17 февраль ҳолатига кўра, жорий йил бошидан буён юртимиздаги барча иссиқлик электр станциялари (ИЭС) ва марказлари (ИЭМ) томонидан жами 10,8 млрд кВт·соат электр энергияси ишлаб чиқарилди. Бу ўтган йилнинг мос давридагига нисбатан 720 млн кВт·соат ёки 7 фоизга кўпни ташкил қилади.
Ҳозирги кунда юртимизда ўрнатилган қуввати 17 551 МВт бўлган жами 17 та ИЭС, 3 та ИЭМ ва 4 та Когенерация маркази фаолият юритмоқда.
ИЭСлар — Қорақалпоғистон Республикаси, Наманган, Қашқадарё, Бухоро, Навоий, Хоразм, Сирдарё ва Тошкент вилоятларида;
ИЭМлар — Фарғона, Қашқадарё ва Тошкент шаҳрида;
Когенерация марказлари —Тошкент шаҳрида жойлашган.
Жорий куз-қиш мавсумида максимум соатлардаги электр энергияси истеъмоли рекорд даражага — 13–13,2 ГВтни, ўтган йилнинг мос давридагига нисбатан 800-900 МВт ёки кунлик 18-20 млн кВт·соат кўпни ташкил этди.
Маълумот учун, 2026 йил 24 январь куни электр энергияси суткалик истеъмолининг тарихий максимум даражаси янгиланиб, кунлик 283 млн кВт·соатни (кичик қувватли қуёш генерациясини ҳисобга олмаганда) ташкил этди.
Эслатиб ўтамиз, 13 февраль куни соат 12:30 ҳолатига юртимиздаги қуёш ва шамол электр станциялари орқали 1 млрд кВт·соат электр энергияси ишлаб чиқарилган эди.