Ўзбекистон Республикаси Энергетика вазирлиги

Энергетика вазирлигининг Жамоатчилик билан алоқалар бўлими бошлиғи Дилдора Хашимова 21 январь куни истеъмолчиларни энергия ресурслари билан барқарор таъминлаш бўйича амалга оширилган ишлар ҳақида маълумот берди.

Электр ва газ таъминоти корхоналарида жами 1 минг 479 та махсус бригада ташкил этилган, ушбу бригадалар таркибида 7 минг 596 нафар ишчи-ходим жойларда кечаю кундуз фаолият юритиб бормоқда.

Кеча, 21 январь куни электр станциялари орқали жами 272,9 млн кВт·соат, режадагига нисбатан 106 фоиз кўп электр энергияси ишлаб чиқарилди.

Республика истеъмолчиларига 245,7 млн кВт·соат, режадагига нисбатан 102 фоиз кўп электр энергияси етказиб берилди. Табиий газ истеъмоли 146,2 млн куб метрни ташкил қилди. Автомобилларга газ тўлдириш компрессор шохобчаларига махсус техникалар ва жамоат транспортлари учун 2 млн куб метр табиий газ етказиб берилди.

2 минг 300 тонна (режага нисбатан 109% кўп) суюлтирилган газ ишлаб чиқарилди. Аҳоли ва ижтимоий соҳа объектларига 2 минг 200 тонна суюлтирилган газ етказиб берилди. Ҳудудлардаги газ тўлдириш шохобчаларида 7,4 минг тонна суюлтирилган газ захираси яратилган.

Биржа савдоларига чиқарилаётган автобензин ҳажми оширилди. Автобензин ва дизель ёнилғиси ҳам аҳоли ва иқтисодиёт тармоқлари эҳтиёжини қоплайдиган даражада етказиб берилмоқда. Хусусан, 21 январь куни биржа савдоларига жами 12,3 минг тонна автобензин ва 14,7 минг тонна дизель ёнилғиси чиқарилиб, шундан 5 минг тонна бензин ва 680 тонна дизель ёнилғиси сотилган.

Шунингдек, биржа савдоларига 2 428 тонна суюлтирилган газ чиқарилиб, шундан 2 368 тоннаси сотилган.

Кеча электр қурилмаларида юзага келган 8 та, газ таъминотида эса 1 та носозлик авария бригадалари томонидан тезкорлик билан бартараф этилган. Тизим 24/7 режимида кучайтирилган тартибда ишлаб, авария бригадалари томонидан носозликлар бартараф этилган ҳолда таъминотни босқичма-босқич тиклаш чоралари кўрилмоқда.

Истеъмолчилардан келиб тушаётган мурожаатларга тезкорлик билан чора кўриш бўйича бригадалар фаолияти йўлга қўйилган. Ҳудудий электр ва газ таъминоти филиалларида ташкил этилган “Call markaz”лар 24/7 режимида фаолият юритмоқда ва истеъмолчиларнинг мурожаатлари тўхтовсиз қабул қилинмоқда.

Батафсил маълумотлар билан Энергетика вазирлиги ва электр ҳамда газ таъминоти ташкилотларининг ижтимоий тармоқлардаги расмий саҳифалари орқали танишиб боришингиз мумкин.

Ҳурматли истеъмолчилар! Электр таъминоти юзасидан 1154, газ таъминоти юзасидан эса 1104, 104 телефон рақамларига мурожаат қилишингиз мумкин.

Қорли кунлар бўлса ҳам, уйингизда илиқлик ва хотиржамлик ҳукм сурсин, азиз юртдошлар! Биз эса сиз учун доимо хизматдамиз.