Энергетика вазири ёш кимёгарлар билан учрашди
2026-01-17 13:35:00 / Янгиликлар
Бугун, 17 январь куни Энергетика вазири Жўрабек Мирзамаҳмудов кимё фанига қизиққан, илмга чанқоқ ёш ака-сингиллар билан учрашув ўтказди.
Қўчқоров Зафаржон айни пайтда 9-синфда, унинг синглиси Қўчқорова Зебо эса 7-синфда таҳсил олади. Улар кимё фанининг сир-асрорларига бўлган катта қизиқиши сабабли “Nekov School” мактабида билим олишмоқда ва қисқа вақт ичида фандаги фаоллиги билан эътибор қозонган.
Ёш кимёгарлар яқинда Халқаро Нобел конгрессида иштирок этиб, у ерда дунёнинг турли мамлакатларидан келган илмий муҳит ва тажрибалар билан танишиб, унутилмас таассуротлар билан қайтишган.
Учрашув давомида вазир ва ёшлар ўртасида кимё фанининг аҳамияти, унинг асосий йўналишлари, фан ва ишлаб чиқариш ўртасидаги узвий боғлиқлик ҳақида қизиқарли ва мазмунли мулоқот бўлиб ўтди. Ёш кимёгарлар ўзларини қизиқтирган саволларига атрофлича жавоб олиш билан бирга, келажакдаги мақсадлари ва орзулари билан ҳам ўртоқлашдилар.
Вазир ёшларга илм йўлида тўхтаб қолмаслик, доим изланишда бўлиш ва ўз олдига катта мақсадлар қўйиш бўйича маслаҳатлар берди. Шунингдек, бундай иқтидорли ёшлар билан келгусида ҳам мунтазам учрашиб туришини, уларнинг ташаббус ва ютуқларини қўллаб-қувватлашга доимо тайёр эканини таъкидлади.